Wasiirka Wasaaradda Caafimaadka iyo Daryeelka Bulshada Koonfur Galbeed Soomaaliya, Mudane Cabdulqaadir Shariif Sheekhuna Maye, ayaa maanta magaalada Baraawe kulan muhiim ah kula qaatay saraakiisha ciidamada Midowga Afrika ee ka howlgala Soomaaliya.
Kulanka ayaa si gaar ah diiradda loogu saaray xoojinta, ilaalinta iyo tayeynta adeegyada caafimaad ee loo fidiyo bulshada, iyadoo ciidamada Midowga Afrika ay door muuqda ka qaataan taageerada iyo horumarinta adeegyada caafimaadka ee bulshada Baraawe iyo deegaannada ku xeeran.
Wasiirka ayaa kulanka ku adkeeyay muhiimadda ay leedahay in la sii xoojiyo wada-shaqeynta iyo iskaashiga dhinacyada caafimaadka, si bulshada deegaanka loo gaarsiiyo adeegyo caafimaad oo tayo leh, joogto ah oo waafaqsan baahiyahooda.
Kulanka waxaa sidoo kale ka qeyb galay Guddoomiyaha Degmada Baraawe, saraakiil ka tirsan ciidamada Koonfur Galbeed Soomaaliya, wakiillo ka socday Hay’adda SOS iyo mas’uuliyiin ka tirsan Wasaaradda Caafimaadka, waxaana si qoto dheer looga wada hadlay sidii loo xoojin lahaa iskaashiga dhinacyada caafimaadka, taageerada adeegyada caafimaad iyo sidii loo heli lahaa xalal waara oo lagu horumarinayo adeegyada bulshada.
Kulankan ayaa qeyb ka ah dadaallada Wasaaradda Caafimaadka Koonfur Galbeed ay ku doonayso in ay dardar-geliso tayeynta adeegyada caafimaadka, xoojiso iskaashiga hay’adaha kala duwan, isla markaana xaqiijiso in bulshada Baraawe ay hesho adeeg caafimaad oo la isku halleyn karo.
