Guddiga Joogtada ah ee Golaha Shacabka Baarlamaanka Jamhuuriyadda Federaalka Soomaaliya ayaa kulankoodii toddobaadlaha ahaa ku yeeshay xarunta Guddoonka iyo Guddiyada ee Villa Hargeysa.
Kulanka waxaa shir guddoominayey Guddoomiyaha Golaha Shacabka, Mudane Cabdulqaadir Maxamed Nuur (Jaamac), oo uu wehliyo Guddoomiye Ku-xigeenka Labaad ee Golaha Shacabka, Mudane Cabdullaahi Cumar Abshirow.
Guddoomiyaha Golaha Shacabka ayaa xubnaha guddiga warbixin ka siiyey kulamo uu la yeeshay qaar ka mid ah Xildhibaannada Mucaaradka, farriimo hambalyo ah oo uu ka helay guddoomiyaasha baarlamaannada dalalka caalamka, hay’adaha iyo ururrada caalamiga ah, iyo sidoo kale guud ahaan howlaha Golaha Shacabka.
Intaas kaddib, Xoghayaha Guud ee Golaha Shacabka, Cabdiraxmaan Maxamed Cabdulle (Jaabiri), ayaa guddiga la wadaagay warbixin ku saabsan hindise-sharciyeedyada horyaalla guddiyada Golaha, kuwaas oo maraya akhrinnada kala duwan.
Sidoo kale, guddoonnada guddiyada Golaha ayaa laga dhageystay warbixinno ku saabsan shuruucda ay gacanta ku hayaan, marxaladaha ay marayaan iyo waqtiga la qorsheynayo in loo gudbiyo kulamada Golaha Wakiillada.
Gebagebadii, Guddoomiyaha Golaha Shacabka ayaa xubnaha Guddiga Joogtada ah kula dardaarmay inay ka shaqeeyaan midnimada iyo wadajirka Golaha, si uu u guto waajibaadkiisa dastuuriga ah.
Guddoomiyaha ayaa sidoo kale ballanqaaday in Golaha lagu hoggaamin doono si waafaqsan xeer-hoosaadka iyo shuruucda kale ee u degsan Golaha Shacabka.
