Ciidanka Kumaandooska Danab ee Ciidanka Xoogga Dalka Soomaaliyeed, gaar ahaan Ururka 161-aad ee Guutada 16-aad, ayaa hawlgal qorsheysan ka fuliyay deegaanka Yaaq-Doomaar oo ka tirsan Gobolka Baay.
Hawlgalka ayaa lagu beegsaday goobo la sheegay in kooxda Al-Shabaab ay u adeegsan jirtay gabaad, isku-abaabul iyo qorsheynta dhaq-dhaqaaqyada ay ka waddo deegaannadaasi.
Intii uu socday hawlgalka, ciidamada ayaa lagu soo warramay inay burburiyeen goobihii bartilmaameedka ahaa ee ay kooxda ku dhuumaaleysanaysay.
Sidoo kale, waxaa ciidamada isku soo dhiibay xubin ka tirsanaa kooxda Al-Shabaab, taas oo loo gudbin doono hay’adaha amniga si loo baaro loona qiimeeyo xogta uu hayo.
Ciidanka Danab ayaa hawlgalkan ku sheegay mid qayb ka ah dadaallada lagu wiiqayo awoodda iyo dhaq-dhaqaaqyada kooxda Al-Shabaab, gaar ahaan deegaannada Gobolka Baay oo muhiim u ah amniga iyo isku-socodka bulshada.
Hawlgallada noocan oo kale ah ayaa sidoo kale lagu xoojinayaa amniga deegaannada ay ciidamada dowladda ka wadaan howlgallada ka dhanka ah Al-Shabaab, iyadoo la doonayo in la yareeyo awoodda kooxda iyo khatarta ay ku hayso shacabka.
Ciidamada dowladda ayaa sheegay inay sii wadi doonaan hawlgallada lagu xaqiijinayo amniga iyo xasiloonida Gobolka Baay.
source SNA radio
