Munaasabad ballaaran oo lagu xusayay dhalashada Suubbanaha Nabigeenna Muxammad (NNKH) ayaa maanta lagu qabtay magaalada Xudur ee xarunta Gobolka Bakool iyo dhamaan deeganada gobalka bakool.
Munaasabadda ayaa waxaa ka qayb galay culimo, waxgarad, maamulka deegaanka iyo qaybaha kala duwan ee bulshada magaalada Xudur.
Intii ay munaasabaddu socotay ayaa lagu jeediyay muxaadarooyin iyo wacdi diini ah oo ku saabsan nolosha, akhlaaqda iyo sunnada Rasuulka Alle (NNKH).
Culimada ayaa bulshada ku boorriyay in ay ku daydaan akhlaaqdii wanaagsanayd ee Nabigeenna Muxammad (NNKH), isla markaana ay xoojiyaan walaaltinimada, nabadda, is-ixtiraamka iyo isku duubnida bulshada.
Munaasabadda ayaa sidoo kale lagu muujiyay jacaylka iyo qaddarinta ay bulshada Xudur u hayso Nabigeenna Muxammad (NNKH), iyadoo lagu xusay fadligiisa iyo kaalintii uu ku lahaa hanuuninta ummadda Islaamka.
Xuska ayaa ku soo dhammaaday duco iyo salaan loo diray Suubbanaha Nabigeenna Muxammad (NNKH), iyadoo bulshada loogu baaqay in ay sii xoojiyaan ku dhaqanka diinta Islaamka iyo sunnada Rasuulka (NNKH).
