Wasaaradda Waxbarashada, Hiddaha iyo Tacliinta Sare ee Soomaaliya ayaa shaacisay natiijada Imtixaanka Qaranka ee sanadkan, iyadoo markii ugu horreysay natiijada ay qeyb ka yihiin ardayda wax ka barata Dugsiyada Farsamada.
Natiijada la shaaciyay ayaa muujineysa in ardayda bartay qeybaha kala duwan ee xirfadaha farsamada ay si wanaagsan uga qeyb qaateen Imtixaanka Qaranka.
Qeybta Beeraha, waxaa imtixaanka ka gudbay 29 arday, halka 7 arday ay ku harreen.Qeybta Dhismayaasha, waxaa ku guuleystay 41 arday, iyadoo aysan jirin wax arday ah oo ku haray imtixaanka.
Sidoo kale, qeybta Korontada, waxaa ka gudbay 37 arday, waxaana dhammaan ardaydii qeybtaas imtixaanka gashay ay ku guuleysteen, iyadoo aan la soo sheegin arday ku haray.
Guud ahaan, natiijadani waxay muujineysaa muhiimadda sii kordheysa ee waxbarashada farsamada iyo xirfadaha gacanta, kuwaas oo door weyn ka qaadan kara diyaarinta dhalinyarada Soomaaliyeed ee suuqa shaqada iyo horumarinta dhaqaalaha dalka.
Wasaaradda Waxbarashada ayaa muddooyinkii dambe xoogga saareysay tayeynta waxbarashada iyo kobcinta fursadaha ay dhalinyaradu ku baran karaan xirfado wax-ku-ool ah oo ay mustaqbalka kaga qeyb qaadan karaan dib-u-dhiska iyo horumarinta Soomaaliya.
