Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa maanta qaabilay Guddoomiyaha Guddiga Madaxa-bannaan ee Xuquuqda Aadanaha Qaranka, Dr. Maryan Qaasim.
Kulanka ayaa diiradda lagu saaray howlgelinta Guddiga, horumarka uu sameeyay lixdii bilood ee lasoo dhaafay iyo dadaallada lagu dhisayo hay’ad qaran oo xuquuqda aadanaha ah oo xooggan, madax-bannaan oo si hufan u shaqeysa.
Madaxweyne Xasan Sheekh ayaa adkeeyay muhiimadda ay leedahay dhiirrigelinta iyo ilaalinta xuquuqda aadanaha, xoojinta isla-xisaabtanka iyo in Guddiga Madaxa-bannaan ee Xuquuqda Aadanaha Qaranka loo fidiyo taageerada uu u baahan yahay si uu si wax-ku-ool ah u guto waajibaadkiisa dastuuriga ah.
Kulankan ayaa ku soo beegmaya xilli Soomaaliya ay waddo dadaallo lagu xoojinayo hay’adaha qaranka iyo nidaamyada ilaalinta xuquuqda aadanaha, iyadoo la doonayo in Guddigu door muuqda ka qaato ilaalinta xuquuqda muwaadiniinta iyo kor u qaadista isla-xisaabtanka hay’adaha dowladda.
