Maamulayaasha dugsiyada ku yaalla degmada Baydhabo ayaa magaalada Baydhabo ku qabtay xaflad si heer sare ah loogu soo dhaweynayay Wasiirka iyo Wasiir Ku-xigeenka Wasaaradda Waxbarashada, Hiddaha iyo Tacliinta Sare ee Koonfur Galbeed.
Xafladda ayaa ahayd munaasabad lagu muujinayay soo dhaweyn iyo taageero loo hayo madaxda cusub ee Wasaaradda Waxbarashada, waxaana ka qeyb galay maamulayaasha dugsiyada iyo qeybaha kala duwan ee bahda waxbarashada degmada Baydhabo.
Maamulayaasha dugsiyada ayaa si diirran u soo dhaweeyay Wasiirka iyo Wasiir Ku-xigeenka, iyagoo sheegay inay ku faraxsan yihiin hoggaanka cusub ee Wasaaradda iyo rajada laga qabo in la dardargeliyo howlaha horumarinta waxbarashada, tayeynta adeegyada waxbarasho iyo kobcinta aqoonta ardayda.
Intii ay munaasabadda socotay, waxaa sidoo kale lagu ammaanay dadaallada madaxda Wasaaradda ay ugu jiraan horumarinta nidaamka waxbarashada iyo abuurista fursado waxbarasho oo wanaagsan, taas oo qeyb ka noqon karta dhismaha mustaqbalka jiilka Soomaaliyeed.
Maamulayaasha ayaa uga mahadceliyay Wasiirka iyo Wasiir Ku-xigeenka ka soo qeybgalka munaasabadda, iyagoo u rajeeyay inay si hufan u gutaan waajibaadka iyo masuuliyadda loo igmaday.
Dhankooda, Wasiirka iyo Wasiir Ku-xigeenka Wasaaradda Waxbarashada ayaa uga mahadceliyay maamulayaasha dugsiyada soo dhaweynta iyo xafladda ay u sameeyeen.
Waxay si gaar ah u bogaadiyeen doorka muhiimka ah ee maamulayaasha dugsiyadu ku leeyihiin tayeynta waxbarashada, maamulka dugsiyada iyo kobcinta aqoonta ardayda.
Munaasabaddan ayaa kusoo beegmaysa xilli dadaallo lagu xoojinayo nidaamka waxbarashada Koonfur Galbeed, iyadoo Baydhabo ay tahay xarun muhiim u ah howlaha waxbarasho ee maamulka.
Maamulayaasha dugsiyada ayaa muujiyay inay diyaar u yihiin inay si dhow ula shaqeeyaan hoggaanka cusub ee Wasaaradda, si loo gaaro yoolalka la xiriira tayeynta waxbarashada, horumarinta macallimiinta iyo sare u qaadista heerka aqoonta ardayda.
