Wasaaradda Caafimaadka iyo Daryeelka Bulshada ee Dowladda Koonfur Galbeed Soomaaliya, oo kaashanaysa Hay’adda UNICEF, ayaa degmada Buurhakaba ee gobolka Bay gaarsiisay sahay nafaqo oo loogu talagalay carruurta ka yar shanta sano ee la ildaran nafaqo-darrada.
Sahayda la gaarsiiyay degmada ayaa ka badan 800 kartoon oo Ready-to-Use Therapeutic Food (RUTF) ah, kuwaas oo loo adeegsan doono daaweynta carruurta ay haysato nafaqo-darrada daran, gaar ahaan kuwa xaaladdooda caafimaad iyo nafaqo ay u baahan tahay daryeel degdeg ah.
Wasaaradda Caafimaadka ayaa sheegtay in sahaydan ay qayb ka tahay dadaallada lagu xoojinayo adeegyada nafaqada iyo yareynta saameynta nafaqo-darrada, iyadoo mudnaanta la siinayo carruurta nugul iyo qoysaska ay xaaladaha bani’aadantinimo saameeyeen.
Mas’uuliyiinta caafimaadka ayaa sidoo kale tilmaamay in xaaladda nafaqo-darrada ee carruurta ka yar shanta sano ay dhawaanahan sare u kacday, sida ay muujinayaan xogaha caafimaad ee laga helayo degmada Buurhakaba, taasoo kordhisay baahida loo qabo sahay caafimaad iyo nafaqo oo joogto ah.
Wasaaradda Caafimaadka iyo Daryeelka Bulshada ee Koonfur Galbeed ayaa sheegtay inay sii wadi doonto dadaallada lagu gaarsiinayo adeegyada nafaqada carruurta nugul, iyadoo kaashanaysa hay’adaha samafalka iyo bahwadaagta caafimaadka.
Ugu dambeyn, Wasaaradda ayaa uga mahadcelisay UNICEF taageerada joogtada ah iyo gaarsiinta sahayda RUTF xilli muhiim ah, iyadoo sheegtay in taageeradan ay door weyn ka qaadaneyso badbaadinta nolosha carruurta la ildaran nafaqo-darrada iyo ka hortagga in xaaladdoodu kasii darto.
