Qaramada Midoobay ayaa digniin culus ka soo saartay xaaladda El Niño, iyadoo Hay’adda Saadaasha Cimilada Adduunka (WMO) sheegtay in dhacdadan cimiladu ay bilaha soo socda si weyn u xoogaysan karto, isla markaana ay noqon karto mid ka mid ah El Niño-yadii ugu xoogga badnaa tan iyo markii la bilaabay kormeerka casriga ah ee cimilada.
WMO waxay sheegtay in ay jirto ku dhowaad 100% fursad ah in El Niño uu sii jiro ilaa Febraayo 2027, iyadoo la filayo inuu heerkiisa ugu sarreeya gaaro dhammaadka sanadkan.
Xogta hay’addu waxay muujinaysaa in biyaha Badweynta Baasifigga ee kulaylaha ay si aan caadi ahayn u diiran yihiin, taasoo sii xoojinaysa dhacdadan.
El Niño waa dhacdo dabiici ah oo ka dhalata kulaylka aan caadiga ahayn ee biyaha bartamaha iyo bariga Badweynta Baasifigga, taasoo beddeli karta dabaylaha, roobabka iyo heerkulka meelo badan oo dunida ah.
Maxaa laga cabsi qabaa?
WMO waxay sheegtay in El Niño-ga xooggan uu kordhin karo khatarta:
Roobab mahiigaan ah iyo fatahaado
Abaaro daba dheeraada
Kulayl daran
Wax-soo-saarka beeraha oo hoos u dhaca
Biyo-yaraan
Cunto-yaraan iyo kororka qiimaha cuntada
Dhibaatooyin ku yimaada nolol-maalmeedka iyo dhaqaalaha bulshadaSaameyntu waxay sii socon kartaa ilaa 2027, xitaa marka El Niño uu hoos u dhaco, maadaama kulaylka kaydsan ee baddu uu muddo ku sii gudbayo jawiga.
Soomaaliya maxay uga dhigan tahay?
Soomaaliya oo horey ula tacaalaysa abaaro, biyo-yaraan iyo nuglaanshaha cuntada, isbeddel kasta oo weyn oo ku yimaada roobabka wuxuu yeelan karaa saameyn culus.
Sidaas darteed, digniinta WMO waxay muhiim u tahay in si hore ah loogu diyaar garoobo xaaladaha cimilada ee keeni kara fatahaado ama roobab aan caadi ahayn, iyadoo la xoojinayo digniinaha hore, kaydka biyaha iyo diyaar-garowga bani’aadannimo.
Hay’adaha Qaramada Midoobay waxay sidoo kale ku boorrinayaan dowladaha iyo hay’adaha gargaarka inay hadda bilaabaan diyaar-garowga, gaar ahaan dhinacyada beeraha, biyaha, caafimaadka, tamarta iyo maaraynta musiibooyinka.
