Madaxweynaha Jamhuuriyadda Federaalka Soomaaliya, Dr. Xasan Sheekh Maxamuud, ayaa la filayaa inuu bartamaha bishan September u safro Mareykanka, halkaas oo uu kaga qayb geli doono Kalfadhiga 81-aad ee Golaha Guud ee Qaramada Midoobay.
Kalfadhiga 81-aad ee Qaramada Midoobay wuxuu si rasmi ah u furmayaa 8 September 2026, halka doodda guud ee madaxda dowladaha ay bilaabanayso 22 September, waxaana ka qaybgalaya madaxda dalalka caalamka.
Sida warar la helayo, Madaxweynaha Soomaaliya waxaa la filayaa inuu New York gaaro qiyaastii 20-ka September, iyadoo wafdi ka tirsan dowladda ay horey u bilaabeen diyaar-garowga iyo qabanqaabada safarkiisa.
Safarka Madaxweynaha ayaa noqonaya fursad uu Soomaaliya kaga hadlo arrimaha muhiimka u ah dalka iyo gobolka, isagoo la filayo inuu kulamo la yeesho madaxda dowladaha kale, mas’uuliyiinta Qaramada Midoobay iyo hay’adaha caalamiga ah ee ka qaybgalaya shirka.
Waxaa sidoo kale New York ka dhacaya shir heer sare ah oo looga hadlayo Soomaaliya, kaas oo qorshuhu yahay 24 September in lagu qabto Golaha Ammaanka, iyadoo diiradda lagu saarayo xaaladda Soomaaliya iyo arrimaha amniga.
Madaxweynaha Xasan Sheekh ayaa sanadkii hore, intii lagu jiray Kalfadhigii 80-aad, khudbad ka jeediyay Golaha Guud ee Qaramada Midoobay, isagoo diiradda saaray arrimaha amniga, dagaalka argagixisada iyo xaaladaha caalamiga ah waxbadan laga weydiin doono waxyaalaha u qabsoomay iyo caqabadaha jira.
Safarka September-ka ayaa sidaas darteed noqonaya mid muhiim u ah Soomaaliya, maadaama Madaxweynaha uu New York kaga qayb geli doono madal ay isugu imaanayaan hoggaamiyeyaasha dunida, isla markaana uu fursad u heli doono inuu soo bandhigo aragtida dowladda Soomaaliya ee ku aaddan amniga, horumarka, iskaashiga caalamiga ah iyo mustaqbalka dalka.
