Ciidanka Xoogga Dalka Soomaaliyeed, gaar ahaan Kumaandooska Danab, oo kaashanaya ciidamada maamulka Koonfur Galbeed, ayaa hawlgallo qorshaysan ka sameeyay deegaanka Madax-Maroodi, oo ku yaalla dhulka u dhexeeya gobollada Shabeellaha Hoose iyo Bay.
Hawlgalladan ayaa qeyb ka ah dadaallada lagu xaqiijinayo amniga deegaanada iyo waddooyinka muhiimka ah ee isku xira gobollada Koonfur Galbeed, iyadoo ciidamada ay beegsanayaan maleeshiyaad ka tirsan Al-Shabaab oo la sheegay inay ku dhuumaaleysanayaan deegaannada miyiga ah.
Ciidamada ayaa sidoo kale hawlgallo ka wada deegaano kala duwan oo hoostaga gobollada Shabeellaha Hoose, Bay iyo Bakool, kuwaas oo ka mid ah meelaha ay ciidamada dowladda iyo kuwa deegaanka ka wadaan howlgallada amni.
Ujeeddada ugu weyn ee howlgallada ayaa lagu sheegay inay tahay daciifinta awoodda Al-Shabaab, ka hortagga dhaq-dhaqaaqyada kooxda iyo xaqiijinta amniga shacabka, gaar ahaan dadka ku nool deegaanada miyiga ah iyo kuwa ku dhow waddooyinka isku xira gobollada.
Saraakiisha ciidamada ayaa muddooyinkii dambe xoogga saarayay hawlgallada qorshaysan iyo baaritaannada lagu raadinayo xubnaha Al-Shabaab, iyadoo la doonayo in laga hortago in kooxda ay dib uga sameysato saldhigyo iyo goobo ay kaga soo abaabusho weerarro.
Hawlgallada ka socda Madax-Maroodi iyo deegaanada kale ee Bay, Bakool iyo Shabeellaha Hoose ayaa sidoo kale qeyb ka noqonaya dadaallada lagu doonayo in shacabka lagu soo celiyo deegaanadii ay amni-darradu saameysay, loona abuuro xaalad amni oo u saamaxda inay si caadi ah u gutaan nolol maalmeedkooda.
Ciidamada Dowladda Federaalka iyo kuwa Koonfur Galbeed ayaa la filayaa inay sii wadaan howlgallada, iyadoo muhiimad gaar ah la siinayo sugidda waddooyinka iyo deegaanada istiraatiijiga ah.
Deeganka Madax-Maroodi waa deegaan ku yaalla dhulka u dhexeeya Gobollada Shabeellaha Hoose iyo Bay, Deegaanku waxuuna kulaala oo wuxuu ku dhow yahay dhulka isku xira Deegaan weynaha Leego iyo deegaannada gudaha ee Bay ee jameecada.
