Taliyaha Qeybta 60-aad ee Ciidanka Xoogga Dalka Soomaaliyeed, Gaashaanle Sare Isxaaq Berdaale, ayaa maanta magaalada Baydhabo ku qaabilay saraakiil sare oo ka tirsan Ciidanka Xoogga Dalka Soomaaliyeed, kuwaas oo magaalada u yimid howlo shaqo.
Kulanka dhexmaray Taliyaha Qeybta 60-aad iyo saraakiisha ayaa looga hadlay xaaladda amniga iyo sidii loo dardargelin lahaa howlaha ciidan ee ka socda deegaannada Koonfur Galbeed Soomaaliya.
Sidoo kale, waxaa diiradda lagu saaray xoojinta wada-shaqeynta iyo isku-duwidda ciidamada, sare u qaadidda howlaha amniga iyo hirgelinta qorshayaal lagu xaqiijinayo amniga guud ee deegaannada hoos yimaada Koonfur Galbeed.
Saraakiisha ayaa sidoo kale isla eegay muhiimadda ay leedahay in la sii xoojiyo iskaashiga iyo isku-xirnaanta hay’adaha amniga, si loo dardargeliyo dadaallada lagu sugayo nabadgelyada iyo xasilloonida shacabka.
Kulankan ayaa qeyb ka ah dadaallada lagu xoojinayo howlaha amni iyo kuwa ciidan ee ka socda deegaannada Koonfur Galbeed Soomaaliya.
