Dowladda Soomaaliya ayaa sheegtay inay diyaarinayso habraac cusub oo lagu nidaaminayo ajaanibta iyo hay’adaha ka shaqeeya duubista muuqaallada iyo dalxiiska gudaha dalka.
Wasiirka Warfaafinta, Dhaqanka iyo Dalxiiska, Cabdifataax Qaasim, ayaa sheegay in habraaca cusub uu qeexi doono meelaha ay ajaanibtu geli karaan iyo goobaha aan loo oggolaan doonin inay tagaan ama muuqaallo ka duubaan.
Wasiirka ayaa sheegay in habraacaasi lagu caddeyn doono waxa qofka ama hay’adda ajaanibta ah loo oggol yahay inay gudaha Soomaaliya ka duubaan iyo meelaha laga mamnuucayo, isaga oo xusay in habraaca la filayo in la soo saaro labada maalmood ee soo socda.
Cabdifataax Qaasim ayaa sheegay in arrintan ay qayb ka tahay dadaallada dowladda ee lagu nidaaminayo hay’adaha dhaqanka, ururrada iyo shirkadaha caalamiga ah ee dalka ka howlgala, si loo hubiyo in waxyaabaha ay baahinayaan aysan ka hor imaanayn dhaqanka iyo qiyamka bulshada Soomaaliyeed.
Wasiirku wuxuu sidoo kale arrinta ku xiray amniga qaranka, isaga oo sheegay in amniga uusan ku koobnayn oo keliya arrimaha ciidamada iyo dadka hubka wata, balse uu sidoo kale ku lug leeyahay ilaalinta dhaqanka, sumcadda dalka iyo muuqaalka Soomaaliya looga gudbinayo caalamka.
“Amniga qaranka marka laga hadlayo, amniga keliya ma aha; inta qoriga wadata keliya ma aha,” ayuu yiri wasiirku, isaga oo intaas ku daray in ilaalinta dhaqanka iyo in dalka laga gudbiyo sawir wanaagsan ay qayb ka yihiin amniga qaranka.
Dowladda ayaa sidoo kale sheegtay inay qorshaynayso in la dejiyo siyaasad iyo sharciyo cusub oo ku saabsan dalxiiska, kuwaas oo lagu nidaamin doono hay’adaha iyo shirkadaha rasmiga ah ee ka shaqeeya dalxiiska gudaha Soomaaliya.
Wasiirka ayaa sheegay in haatan ay jiraan shaqsiyaad iyo ururro kala duwan oo arrimaha dalxiiska iyo duubista muuqaalada ka shaqeeya, balse aan dhammaantood ku dhisnayn habraac iyo sharci cad.
Sida uu sheegay, nidaamka cusub ayaa lagu doonayaa in lagu kala saaro hay’adaha rasmiga ah iyo kuwa aan haysan nidaam sharciyeed oo ay dowladdu kula xisaabtami karto.
