Maamulka Somaliland ayaa magaalada Gabiley ku xiray wariye Xasan Sulaiman Harun Gallaydh, oo ka mid ah saxafiyiinta Soomaaliyeed ee muddo dheer ka shaqeynayay warbaahinta, sida ay sheegayaan wararka soo baxaya.
Xasan Gallaydh ayaa hore uga soo shaqeeyay warbaahin ay ka mid yihiin Horn Cable TV iyo BBC Somali, sidoo kalena waa aas-aasaha Galaydh Media.
Wariyaha ayaa horey loogu xiray Somaliland, oo ay ka mid ahayd xarig lala xiriiriyay saxafiyiin kale xilli ay tebinaayeen dhacdooyin ka dhacay xabsiga Hargeysa.
Xariggan cusub ayaa kusoo beegmaya xilli ay Somaliland ka taagan yihiin walaacyo la xiriira xaaladda xorriyadda saxaafadda iyo xarigga saxafiyiinta.
Hay’adaha u dooda xorriyadda saxaafadda ayaa sanadkan dhowr jeer soo saaray digniino ku saabsan saxafiyiin lagu xiray Somaliland iyadoo aan si cad loo shaacin eedeymaha loo haysto.
Sidoo kale, wariye Cabdiqani Xuseen Abokor (Baylood) ayaa lagu xiray Hargeysa 29-kii Agoosto, waxaana warbixinno ay sheegeen in muddo lagu hayay xabsi iyadoo aan dacwad rasmi ah lagu soo oogin.
Xarigga Xasan Gallaydh iyo kiisaska kale ayaa dib u soo cusbooneysiinaya doodda ku saabsan sida maamulka Somaliland ula dhaqmo saxafiyiinta iyo warbaahinta madaxa-bannaan.
Ururrada saxaafadda ayaa ku adkeysanaya in saxafiyiintu ay helaan fursad ay si xor ah ugu gudan karaan waajibaadkooda, iyadoo la dhowrayo sharciga iyo xuquuqda aasaasiga ah.
Ilaa hadda, ma jiraan faahfaahin rasmi ah oo ku filan oo ka soo baxay maamulka Somaliland oo caddeynaya sababta rasmiga ah ee loo xiray Xasan Gallaydh ama muddada lagu hayn doono xabsiga.
