Kubad sameeyaha Blues Cesc Fabregas ayaa gaashaanka u daruuray wararka xanta ah ee sheegaya in lagu wargeliyay inuu ka tagi karo garoonka Stamford Bridge.
Sida ay qorayeen warbaahinta kubadda cagta shalayto – Antonio Conte ayaa ku wargeliyay Fabregas inuu ku jiro liiska ciyaartoyda Blues ee la iibin doono ka hor inta uusan xirmin suuqa kala iibsiga ciyaartoyda iyagoo daliishanaya in xidigaan reer Spain uusan wali kusoo bilaaban kulamada EPL-ka ee kooxda.
Si kastaba Fabregas wuxuu beeniyay war walba oo ay warbaahintu qortay isagoo shaaca ka qaaday in isaga iyo Conte ay leeyahiin xiriir wanaagsan isla markaana uu u sheegay inuu siin doono fursad uu kooda ugu ciyaaro.
“Waa been abuur waxa la qoray, macalinka iyo aniga waxaan leenahay xiriir wanaagsan, waligiisna iguma wargelin inaan bixi karo” ayuu qoray Fabregas.
“Wuxuu ii sheegay inuu i xisaabin doono, sida aan isku xisaabiyo. waxaan wadi doonaa dagaalka aan ugu jiro booskeyga kooxda ilaa ugu dambeynta. marka la ii yeerana waxaan kooxda siin doonaa dadaalka iigu fiican”
Ugu dambeyntiina Fabregas ayaa qiray inuu daacad u yahhay kooxda isla markaana uu walba u sameyn doono si ay kooxda u guuleysato.
