AKHRISO:- Wasiir ka tirsan Xukuumadda oo caawa lagu dilay Muqdisho

{WARSANRADIO}Wasiirkii Howlaha Guud ee Xukuumadda Soomaaliya Cabaas Siraaji ayaa goor dhow lagu dilay magaalada Muqdisho, iyadoo warar kala duwan ka soo baxayaan dilkiisa.

Warar horu dhac ayaa sheegaya in Wasiirka lagu dilay agagaarka Madaxtooyada, xilli uu saarnaa gaariga.

Sidoo kale waxaa la sheegayaa in gaari uu saarnaa ay rasaaseeyeen Ciidamo ka tirsan dowladda Soomaaliya oo ka shakiyay gaari uu watay.

Wararka ayaa intaa ku daraya in Gaariga Wasiirka saarnaa oo ahaa kuwa raaxada uu ku dhowaaday gaari kale oo ay saarnaayeen ciidamo hubeysan oo ilaalinayeen Mas’uul ka tirsan dowladda.

Wasiirka Warfaafinta Xukuumadda Soomaaliya Eng. C/raxmaan Yariisow ayaa bartiisa Facebook ku soo qoray in Wasiirka ay rasaas ku fureen ciidamo, baaritaan uu socday.

Ciidamada Ammaanka Soomaaliya ayaa gacanta ku dhigay ciidamadii dilka ka dambeeyay, kuwaasoo la sheegay inay ahaayeen Ilaalada Hanti dhowrka Guud ee Qaranka.

Allaha u naxariistee Cabaas Siraaji ayaa ahaa Wasiirkii ugu da’da yaraa ee Xukuumadda Soomaaliya, waxaa uu sidoo kale ka mid ahaa dhalinyaradii ku soo biirtay Baarlamaanka Federaalka.