Wafdiga Madaxweynaha ayaa waxaa garoonka diyaaradaha Joma Kenyatta ku soo dhoweeyay Wasiirka Gaadiidka Kenya James Macharia iyo Mas’uuliyiin kale.
Ujeedada safarka Madaxweynaha ayaa ah ka qeybgalka shir caalami ah oo loogaga hadlayo arrimaha horumarinta dadka iyadoo uu shirkan uu soo qabanqaabiyay Sanduuqa Qaramada Midoobey ee Horumarinta Dadka (UNFPA).
Sida wararku sheegayaan shirka uu ka qeyb gelayo Madaxweyne Farmaajo ayaa waxaa wehliya kulan gaar ah oo uu la qaadan doono Madaxweyaha Kenya Uhuru Kenyatta, oo la sheegayo inuu ahaa balan labada Madaxweyne horay u taalay.
Kulankan ayaa noqonaya kii 3aad oo labada Madaxweyne yeesheen muddo saddex bilood gudahood laga soo bilaabo Shirkii Qaramada Midoobey New York ee September, Shirkii Addis Ababa ee furitaanka Beerta Midnimada iyo shirka gaarka ah ee Nairobi ku dhex mari doona.
Dadka odorasa siyaasadda ayaa hadal haya in shirka gaarka ah ee Madaxweyne Farmaajo iyo Uhuru Kenyatta yeelanayaan looga hadlayo xiriirka labada dal oo bilihii u dambeeyay xumaa, arrinta Jubbaland iyo dacwada weli rahman ee taala Maxkamadda ICJ ee la xiriira Muranka Badda, taasoo dhowaan dib loo dhigay illaa bisha June sanadka 2020.