Waxaa Maanta xal laga gaarey khilaaf dhinaca Maamulka Gobolka Hiiraan ah oo saddexdii todobaad ee la soo dhaafay ka taagnaa Magaalada Beledweyne ee Xarunta Gobolka Hiiraan,kaas oo u dhaxeeyey Guddoomiyihii hore ee Gobolka Hiraan iyo Guddoomiyaha Cusub.
Kulan saacado badan qaatay oo Maanta ka dhacey Xarunta Maamulka Gobolka Hiiraan ayaa Guddoomiyihii Gobolka Hiiraan ee laga qaadey Cali Muxumed Carraale wuxuu xilkii ku wareejiyey Guddoomiyaha Cusub ee Gobolka Hiiraan Cali Jeyte Cismaan.
Kulamada ayaa waxaa qeyb ka ahaa Ugaaska Gobolka Hiiraan Ugaas Khaliif Ugaas Rooble,saraakiisha Ciidanka xoogga dalka qeybta 27aad, saraakiisha Ciidanka AMISOM iyo Xubno kale,iyada oo ugu dambeyn khilaafkii jirey xal looga gaarey.
Guddoomiyihii hore ee Maamulka Gobolka Hiiraan Cali Muxumed Carraale oo Saxaafadda la hadlay ayaa waxaa uu sheegay in muddoo laba Cisho ka hor ah kulan uu la qaatey Ugaas Khaliif Ugaas Rooble uu Go’aan sadey in uu xilka wareejiyo,isaga oo tilmaamey in uu la Shaqeyn doono Guddoomiye Cali Jeyte Cismaan.
Dhinaca kale Guddoomiyaha Cusub ee Gobolka Hiiraan Cali Jeyte Cismaan oo isna hadley ayaa uga mahad celiyey Cali Muxumed Carraale Go’aanka uu qaatey,isaga oo sheegay inay siyaasadda ka wada Shaqeyn doonaan.
Tallaabada xil wareejinta ah ee uu qaatey Guddoomiyihii hore ee Gobolka Hiiraan Cali Muxumed Carraale ayaa daba soctey kadib markii Ciidamo uu watay Guddoomiyaha Cusub ee Gobolka Hiiraan Cali Jeyte Cismaan ay si awood ah kula wareegeen Xarumaha Maamulka ee Magaalada Beledweyne.
