Trump oo ku hanjabey in uu xirayo baraha bulshada
Xoghayaha warbaahinta ee Aqalka Cad Kayleigh McEnany ayaa sheegtay in Madaxweyne Trump uu maanta oo khamiis ah soo saarayo amar Madaxweyne oo ka dhan ah baraha bulshada isku xira, sida Twitter-ka
Kayleigh McEnany ma aysan cayimin waxa amarkani ka dhignaan doono dhaqan-galkiisa.
Arrintan ayaa imaanaysa ka dib markii maalintii Talaadada, markii ugu horeysay ay faragalin ku sameysay bartiisa Twitterka Madaxweyne Trump. Twitter ayaa go’aan ku gaartey qoraalada marinhabaabinta ah ee Madaxweyne Trump in ay hoos dhigaan link ay ku qoran tahay “Hel xaqiiqada” si dadku u helaan xaqiiqada, qoraalada Twitter-ku ku lifaaqey fariinta Trump ayaa noqdey kuwo wiiqaya sheegashada Trump.
Trump ayaa ku jawaabey isagoo ku eedeeyay Twitter-ka inay xanibeen xorriyadda hadalka oo ay aamusinayaan codadka muxaafidiinta.
“Si adag ayaannu u xakamayn doonnaa ama waan xiri doonnaa,” ayuu Trump ku qoray bartiisa Twitter-ka, isaga oo tixraacaya baraha warbaahinta bulshada.
Trump ayaa sidoo kale qoray in Twitter-ka uu hadda faragelin ku hayo doorashada madaxtinimada ee 2020.
Ma cadda in Trump uu awood u leeyahay in uu dhaqan geliyo hanjabaada xiritaanka, tusaale ahaan, Twitter.
Madaxa shirkadda Twitter Jack Dorsey ayaa sheegay in qoraalada qaar ee Donald Trump lagu xiro Fact Check ka dhigimeyso shirkadda Twitter, mid u gar qaadeysa runta iyo beenta.
“Ujeedadayadu waa inaan isku xirno hadalada is khilaafsan oo aan tusno macluumaadka muranka ka taagan yahay si dadku ay iyagu go’aan u gaaraan waxay rumeysanayaan. “
Madaxweynaha Maraykanka Donald Trump ayaa sare usii qaaday weerarka afka ah ee uu la beegsanayo shirkada Twitter, isagoo sheegay in hadii sharciga u fasaxayo uu xirayo shirkadaasi oo uu sheegay inay “Afka-heyso” taageerayaashiisa iyo dadka la fikirka ah.
Trump ayaa todobaadkan ka carooday kadib markii Shirkada Twitter ay bilowday in fariimaha BEENTA ah ee uu Trump twitter ku qoro ay raaciso lifaaq ama Link wata xog (Fact Check) dheeraad ah oo lagu beeninayo beenta uu faafiyo Madaxweynaha Maraykanka.
Donald Trump oo xalay shir jaraa’iid uu qabtay ku saxiixay sharci cusub ama dikareeto Madaxweyne oo uu sheegay in lagu xakameyn doono shirkadaha leh Shabakada Baraha-Bulshada, ayaa sheegay inuu jeclaan lahaa inuuba gebi ahaan XIRO shirkada Twitter.
Trump ayaa yiri “…waxaan eegayaa in sharciga awood iisiinayo waxaana la tashanayaa Qareemadeyda…”
Waa hanjabaadii ugu danbeysay oo uu Trump u dirayo shirkadaha iyo mulkiilayaasha Baraha Bulshada xili uu olole ugu jiro doorashada dhici doonta Bisha November oo uu ka cabsi qabo in looga guuleysto.
Shirkadda Twitter oo qarisay qoraal uu barta soo dhigay madaxweyne Trump
Shirkadda ayaa qarisay qoraallo uu bataas soo dhigay madaxweynaha Mareykanka Donald Trump.
Shirkadda baraha bulshada ee Twitter ayaa ku eedeeysay madaxweynaha Mareykanka Donald Trump inuu horseedayay kicinta rabshado xilli uu qoraal soo dhigay bartaas, madaxweynaha wuxuu ka hadlayay dibadbaxyada ka socda magaalada Minnepolis ee looga soo horjeeda dilkii ninka madowga ahaa ee loogu geystay halkaas.
Twitter wuxuu qoraallada ku baddashay digniin ah in aanan la aqrin karin.
Arrintani ayaa noqoneysaa dagaalkii ugu dambeeyay ee dhexmara shirkadda Twitter iyo aqalka cad.
Trump wuxuu ku eedeeyay koox tuugo ah inay dab qabadsiiyeen saldhig boolis oo ku yaalla Minneapolis. Wuxuuna ka digay in markii ay bilowdeen falalka dhaca ah ay sidoo kale bilaabatay rasaasta .
Shirkadda Twitter waxay sheegtay in qoraalka Trump uu soo dhigay halkaas uu jebinayay shuruucdeeda isla markaana ay meesha ka saartay si aanan loo akhrin.