Taliska ciidanka booliiska Soomaaliya ayaa faahfaahin hor dhaca ka bixiyey halka uu ahaa bartilmaameedka qaxarii saakay ka dhacay Muqdisho.
Qaraxa ayaa ka dhacay afaafka hore ee xarunta ilaalinta canshuuraha booliiska ee degmada Xamar Jajab, taas oo ka soo hor jeeda dekedda weyn ee Muqdisho.
Afhayeenka ciidamada booliiska Soomaaliyeed Dhamme Sadiiq Aadan Cali oo la hadlay warbaahinta Qaranka ayaa sheegay in bartilmaameedka qaraxaas uu ahaa xarunta ilaalinta canshuuraha.
Sidoo kale afhayeenka ayaa sheegay ciidamadii ilaalada ka hayey xaruntaas ay ka hor tageen gaariga oo doonayey in uu gudaha u galo xarunta, isla markaana uu ku qarxay banaanka hore ee xarunta.
Sidoo kale afhayeenka booliska ayaa sheegay in weli ay socdaan baaritaanada qaraxaas, waxaana jira khasaare dhimasho iyo dhaawacba leh oo ka dhashay, in kastoo aysan weli laama ammaanku soo bandhigin inta uu dhanyahay khasaarahaas.
