Cali Daahir Ciid, Madaxweyne Kuxigeenka Galmudug ayaa Madaxtooyada Magaalada Dhuusamareeb kula kulmay garab ka mida guddiga loo xilsaaray inay baaritaanka ku soo sameeyaan shantii qof ee Arbacadii lagu dilay deegaanka Xirsi Lugey ee duleedka Degmada Balanballe ee Gobolka Galgaduud.
Madaxtooyada Galmudug ayaa gadaal ka riixeysa in si deg deg ahi cadaaladda lagu horkeeno kuwii ka dambeeyay falkaasi, iyadoo yoolkuna yahay in laga hortaggo isku dhacyo beeleed oo dilka dadkaasi ka dhasha.
Guddiga ayaa Madaxweyne Kuxigeenka u sheegay in baaritaanka ay ka bilaabeen wadahadalo ay Magaalada Guriceel kula yeesheen Odayaasha Dhaqanka ee dadkii la dilay, oo uu ka mid yahay Ugaas Xasan Ugaas Maxamed Ugaas Nuur, isla-markaana ay si wanaagsan u soo dhaweeyeen.
Guddiga ayaa sheegay in Odayaasha Dhaqanka ay isla garteen in falkaasi lagu wajaho, sida ugu wanaagsan, uguna haboon, lagana hortaggo in dhibkaasi dhacay lagu bedelo mid kale.
Guddiga ayaa tilmaamay in Odayaasha Dhaqanka ay u soo dhiibeen arrin adag, oo ay tahay bay yiraahdeen in maamulku uu wax ka qabto, inkastoo aanay Warbaahinta la wadaagin dhambaalkii dhaqanka. Guddiga ayaase xusay in muddo toddobo cisho ka dib ay isku afgarteen in ay kulan kale yeeshaan.
Dhanka kale garabka kale ee guddiga ayaa iminka baaritaanka dhacdadaasi u joogga Degmada Balanballe, iyagoona kulamo kula leh maamulka degmada iyo weliba dadka deegaanka.
Cali Daahir Ciid, Madaxweyne Kuxigeenka Galmudug oo Warbaahinta la hadlay ayaa marka hore ka mahadceliyay shaqada guddiga, isagoona ballanqaaday in cadaaladda la horkeeni doono dembiile-yaashii falkaasi gaystay.
Madaxweyne Kuxigeenka ayaa afka ku ballaariyay in ay ka shaqayn doonaan dib u heshiisiin beelaha iyo sidii dadka deegaanka ay nabad ugu wada noollaan lahaayen.
Khamiistii ayay ahayd markii Maxkamadda Ciidamada Qalabka Sida ay Galmudug ka dalbatay in gacanta lagu soo dhigo maleeshiyadii shantaasi qof ku dishay deegaanka Xirsi Lugey, sharcigana la horkeeno.