Waxaa Maanta oo sabti ah lagu wadaa in Xarunta Teendhada Afisyooni ee xeyndaabka Garoonka Aadan Cadde ee Magaalada Muqdisho ka dhacdo doorashada Guddoomiyaha Guddiga doorashooyinka heer Federaal iyo ku-xigeenkiisa.
Xubnaha qaban-qaabada doorashada ayaa diiwaan-geliyay Musharaxiin dhowr ah oo u tartamaya xilka Guddoomiyaha Guddiga doorashooyinka heer Federaal iyo ku-xigeenkiisa, kuwaasi oo ka tirsan isla Guddiga doorashada Federaalka.
Saacadihii lasoo dhaafay ayaa waxaa la sheegay inay dhaceen kulamo siyaasadeed oo ku aadan doorashada Maanta ka dhaceysa Xarunta Teendhada Afisyooni, waxaana la tilmaamay in loolan adeg loogu jiro xilka Guddoomiyaha Guddiga doorashada.
Wararka ayaa intaas waxaa ay kusii darayaan inuu socdo Mooshin xilka looga qaadayo Guddoomiye ku-xigeenka Guddiga doorashooyinka heer Federaal Mowliid Mataan Salaad, iyadoona la dooran doono Guddoomiye cusub iyo ku-xigeenkiisa.
Si kastaba Maxamed Xasan Cirro oo ahaa Guddoomiyihii Guddiga doorashada Federaalka ayaa xilka laga qaaday, kadib markii lagu eedeeyay inuu ku milman Arrimaha siyaasadda dalka.
