Wasiirka Warfaafinta Soomaaliya Sanoter Cusmaan Abuukar Dubbe, wasiiru dowlaha wasaaradda howlaha guud Gen. Bashiir Gooble iyo masuuliyiin kale ayaa isbitaal ku yaalla magaalada Istanbul ee dalka Turkiga ku booqday Afhayeenka Xukuumadda Maxamed Ibraahim Macallimuu, oo ka soo bogsanaya dhaawac ka soo gaaray qarax uu ku weeraray qof naftii halige ah 16-kii Bishaan Janaayo.Wasiir Cusmaan Dubbe iyo Wasiir Bashiir Goobe oo warbaahinta kula hadlay isbitaalka ayaa sheegay in xaaladda caafimaad ee Macalimuu ay soo hagaageyso, iyagoo u mahad celiyey Ra’iisul Wasaare Rooble oo dadaal badan ku bixiyey in Afhayeenka Xukuumadda uu daryeel caafimaad helo.Masuuliyiintaan oo ku sugan magaalada Istanbul ee dalka Turkiga ayaa habeen hore sidaan oo kale hoygiisa ugu booqday Agaasimaha SNTV Sharma’arke Maxamed Warsame oo ka soo kabsanaya dhaawacyo culus oo ka soo gaaray qarax uu 20-kii November ku weeraray qof naftiisa haligay, kaas oo lagu dilay Agaasimihii Radio Muqdisho Cabdicasiis Afrika.
