Baydhabo-{WMN}-Madaxweynaha Jamhuuriyadda Federaalka Soomaaliya Xasan Sheekh Maxamuud ayaa Madaxtooyada ku qaabilay Danjiraha Dowladda Finland u fadhiya Soomaaliya Pirkka Tapiola.
Kulanka Madaxweynaha dalka iyo Safiirka ayaa diiradda lagu saaray kor u qaadidda taageerada Midowga Yurub oo ay qeyb ka tahay dowladda Finland, adkeynta cilaqaadka labada dal, horumarinta dhaqaalaha, iskaashiga, qorshaha dowladda Soomaaliya ee xoojinta amniga, xasilloonida dalka iyo la dagaallanka argagixisada. Sida lagu yiri qoraal ka soo baxay Madaxtooyada
Sidoo kale qoraalka ka soo baxay Madaxtooyada Soomaaliya ayaa lagu sii yiri “Madaxweynaha Jamhuuriyadda Federaalka Mudane Xasan Sheekh Maxamuud ayaa xusay sida ay dowladda Soomaaliya uga go’an tahay xoreynta deegaannada ay kaga sugan yihiin argagixisada Al-Shabaab oo ay ka soo maleegaan qorsheyaasha gurracan ay ku dhibaateeyaan shacabka Soomaaliyeed.”
Ugu dambeyn Danjiraha dowladda Finland Pirkka Tapiola ayaa sheegay in dowladda Federaalka Soomaaliya ay ka gacan-siinayaan arrimaha hortebinta u leh, oo ay ugu horreeyaan la wareegidda amniga guud ee dalka, xoojinta federaaleynta iyo daadejinta hannaanka dowliga ah.
Madaxweynaha Jamhuuriyadda Federaalka Soomaaliya Xasan Sheekh Maxamuud ayaa wada kulamo uu la yeelanayo Wakiillada Beesha Caalamka uu fadhigoodu yahay Muqdisho, isaga oo kala hadlay kor u qaadista xiriirka ay la leeyihiin Dowladda iyo wax ka qabashada Amniga, dhaqaalaha iyo Dowlad wanaaga.