Baydhabo-{WMN}- Warsaxaafadeed ka soo baxay dowladda Soomaaliya ayaa waxaa looga hadlay howlgal culus oo ay xalay ciidamada Xoogga dalka ka sameeyeen deegaanka Mubaarak ee gobolka Shabeelaha Hoose.
Howlgalkan ayaa waxaa lagu beegsaday xarun ay Al-Shabaab lacago uga qaadi jireen shacabka, sida lagu sheegay qoraalka ka soo baxay dowladda Soomaaliya.
Sidoo kale dowladda ayaa shaaca ka qaaday inay howlgalka ku dishay saraakiil uu ka mid ahaa hoggaamiye ku xigeenkii Al-Shabaab ee deegaanka Mubaarak, isla-markaana ay ku dhaawacday 10 kale oo uu ku jiro sarkaalkii Al-Shabaab ee ugu sarreeyey deegaankaasi.
“Bartilmaameedka howlgalkaas ayaa ahaa xuruntii ugu weyneed ee Argagixisadu ay baada uga uruuri jirtay dadka ku nool gobolka Shabeellada Hoose, waxaana la dilay xubnihii ugu sareeyey argagixisadii joogtay Mubaarak” ayaa lagu yiri warsaxaafadeedka dowlada dhexe.
