Baydhabo-{WMN}-Gobolka Tigreega ee waqooyiga Itoobiya ayaa lagu qaaday duqeymo cirka ah , sida ay sheegeen saraakiisha deegaanka, laba maalmood kadib markii maamulka TPLF ee halkaas ku sugan ay sheegeen in ay diyaar u yihiin xabbad-joojin.
Duqeynta la sheegay in ay ka dhacday xarunta gobolka ee Mekele ayaa waxaa ku dhaawacmay ugu yaraan hal qof, sida uu sheegay Kibrom Gebreselassie, oo ah sarkaal sare oo ka tirsan isbitaalka Ayder Referral Hospital, oo ah kan ugu weyn Tigrayga.
“Hal bukaan oo dhaawac ah ayaa soo gaaray Ayder. Wadarta khasaaraha ilaa hadda lama oga,” ayuu ku qoray Twitter-ka.
Jabhadda Tigreega ee TPLF oo dagaal kula jirta ciidamada Itoobiya iyo xulafadeeda muddo ku dhow laba sano ayaa sheegtay in diyaarad aan duuliye lahayn ay “duqeysay” jaamacadda Mekele subaxnimadii Talaadada, halkaas oo ay ka geysatay khasaare naf iyo maalba leh
Tani waxay dhacaysa kadib markii xukuumadda Tigray ay dhistay koox wadaxaajood ah waxayna muujisay inay diyaar u tahay wadahadal nabadeed,” ayuu afhayeenka TPLF Kindeya Gebrehiwot ku yiri boggisa Twitter-ka.
AFP ma aysan awoodin in ay si madax banaan u xaqiijiso sheegashooyinka. Gelitaanka waqooyiga Itoobiya ayaa si aad ah loo xaddiday, gobolka Tigraygana waxa ay ku jirtay xannibaad isgaarsiinta ah muddo sannad ka badan.
Xukuumadda Ra’iisul Wasaare Abiy Axmed ayaan ka hadlin duqeymaha la sheegay in lagu sameeyay, iyada oo af hayeenka dawladduna aanu ka jawaabin codsiyo la xiriira inay dhinacood ka hadlaan arrintan.
