Baydhabo-{WMN}-Ciidamada dowladda iyo dadka degaanka ee hubka qaatay oo dhawaan Al-Shabaab kala wareegay degaanka Wabxo ee Gobolka Galgaduud ayaa saaka halkaasi ka wada howlgallo iyo dhaq dhaqaaqyo ciidan.
Ciidamada oo isku fidiyay Xaafadaha iyo daafaha degaanka Wabxo ayaa wada baaritaano la xiriira soo saarista miinooyin ay Al-Shabaab ku aaseen ka hor inta aysan ka bixin degaanka.
Saraakiisha howlgalka hoggaamineysa ayaa sheegay inay ka go’an tahay in degaannada kale ee hoostaga degmada Ceelbuur ka saaraan Al-Shabaab oo muddo ka badan 10 sano ay maamulayaan.
Howlgallada oo todobaadkaan ka bilaawday gobolka Galgaduud ayaa waxaa horkacaya Xildhibaan Maxamed Abuukar Jacfar oo katirsan Xildhibaannada Golaha Shacabka, waxaana uu Warbaahinta u sheegay in dagaalladii ay la galeen Al-Shabaab ay Xubno badan uga dileen.
