Wararka naga soo gaaraya degmada Bu’aale ee Xarunta Gobolka Jubbada Dhexe ayaa waxaa ay sheegayaan in Maanta ay go’day Buundadii degmadaas, kadib markii ay saameeyeen fatahaad uu sameeyay Wabiga Jubba iyo Roob maalmihii la soo dhaafay ka da’aayay Magaaladaas.
Degmada Bu’aale oo ay Maamulaan Al-Shabaab ayaa lagu soo waramayaa in gabi ahaan ay go’day Buundadda magaalada, taas oo hakisay isku socodka dadka iyo Gaadiidka, isla markaana saameyn xoogan ku yeelatay nolosha dadka Shacabka ah.
Majirto khasaaro nafeed oo ka dhashay Go’itaanka Buundada degmada Bu’aale ee Gobolka Jubbada Dhexe, hayeeshee aan weli xog faah faahsan aan laga helin maadaama degmadaas ay maamulaan Ururka Al-Shabaab.
Mas’uuliyiin katirsan Maamulka Jubbaland ayaa xaqiijiyay inay burburtay Buundadii degmada Bu’aale, sidoo kalena fatahaada Wabiga uu saameyn xoogan ku yeeshay dadkii ku noolaa degmada Bu’aale iyo degaannada hoostaga.
Waxaa jira weli deegaano kale oo laga cabsi qabo in ay buundooyinkooda go’aan oo ay ku sugan yihiin Al-Shabaab wallow badi dadkii deganaa degmooyinkaas ay fatahaada iyo daadaka roobka aawgeed uga barakaceen.
Dhawaan waxaa go’ay Buundooyinkii degmooyinka Baardheere iyo Buurdhuubo ee Gobolka Gedo, halkaas oo uu fatahaado xoogan ka geystay Wabiga sidoo kalena ay ka da’een roobab daadad watay, taas oo keentay in Boqolaal Qoys ay ka barakacaan.
Dhawaan waxaa degaano kuyaalla duleedka Magaalada Kismaayo gaaray Boqolaal Qoys oo ka barakacay fatahaada uu wabiga ka sameeyay degaano katirsan gobolka Jubbada Dhexe oo ay maamulaan Al-Shabaab, waxaana booqday Madaxweynaha Jubbaland Axmed Maxamed Islaam, isaga oo u ballan qaaday inay u soo gurman doonaan.
