Wasiiru-dowlaha Arrimaha Dibadda dowladda Qatar Sultan Bin Saad Al Muraikhi ayaa Maanta Warqadaha aqoonsiga danjiranimo ka guddoomay Safiirka cusub ee Soomaaliya u qaabilsan arrimaha Qatar Maxamed Axmed Sheekh Cali Doodishe.
Xafladda wareejinta nuqul ka mid ah warqadaha aqoonsiga ayaa ka dhacday xarunta wasaaradda arrimaha dibadda ee caasimadda Qatar ee Dooxa, iyadoo ay goob joog ka ahaayeen masβuuliyiin ka tirsan hab-maamuuska iyo diblomaasiyiin.
Wasiiru dowlaha Arrimaha Dibadda ayaa u rajeeyay Safiirka cusub ee Soomaaliya in uu ku guuleysto xilka loo igmaday, si loo xoojiyo xiriirka walaaltinimo iyo ballaarinta aragtidooda dhinacyada kala duwan ee u adeegaya danaha labada dal iyo ka mira dhalinta himilooyinka laba dal.
Madaxweynaha dowladda Federaalka Soomaaliya Xasan Sheekh Maxamuud ayaa Wasiirkii amniga gudaha Xukuumadda, Maxamed Axmed Sheekh Cali (Doodishe) u magacaabay Safiirka Soomaaliya ee waddanka Qatar.
Doodishe oo muddo ku dhow laba sanno ahaa wasiirka amniga gudaha ayaa hadda noqon doono Danjiraha Jamhuuriyadda Federaalka Soomaaliya u fadhin doona dalka Qatar oo kamid ah dowladaha Carbeed ee haatan xiriirka wanaagsan la leh Soomaaliya.
