War ka soo baxay Warbaahinta ku hadasha afka dowladda Soomaaliya ayaa lagu sheegay in Dowladda Soomaaliya ay ka war hayso kala carar iyo qax ay ka bilaabeen horjoogayaashii ugu sareeyay ee maleeshiyaadka Al shabaab ee ku sugan Magaalada Jilib ee Gobola Jubbada dhexe halkaasi oo aheyd xaruntii ugu weyneed ee kooxda.
“Jahwareer xoogan ayaa soo wajahan Al shabaab kii Jilib kusugneyd wixii ka dambeeyay markii ay Dowladda Soomaaliya ay Degmadaasi ka fulisay duqeymo lagu bartilmaamaysaday xarumo muhiim u ahaa kooxda sidoo kalena lagu dilay tiro kamid ah dagaal yahanada Al shabaab.” ayaa lagu yiri qoraalka.Sidoo kale qoraalka ayaa lagu sheegay in horjoogeyaasha Al shabaab ay bilaabeen inay ka qaxaan magaalada, iyaga iyo qoysaskooda, isla markaana raadinayaan goobo cusub oo ay ku dhuumaaleystaan.
Waxaa la rumeysan yahay in tiro horjoogeyaal ah iyo boqolaal Al shabaab ka tirsan ay ku dhinteen weerarada Ciidamada Qalabka Sida ay ku qaadeen degmada Jilib, iyadoo boqolaal kale oo dhaawaca Al shabaabna ay ku dayacan yihiin magaaladaas sida uu baahiyay telefishinka Qaranka Soomaaliya.
Dowladda Soomaaliya ayaa markale waxa ay ugu baaqday maleeshiyaadka Al shabaab in fursadda keliya oo ay haystaan ay tahay inay isku soo dhiibaan dowladda, isla markaana ay ku tusaale qaataan dayaca dhalinyarada la soo marin habaabiyey ku qabsadey Jilib, oo boqolaal ay naftooda ku waayeen, kuwo intaas ka badanna ay dhaawacyo halis ah soo gaareen.
Dowladda Federaalka Soomaaliya waxay mar kale ku celisay in Degmada Jilib iyo dhammaan goobaha ay ku sugan Al shabaab ay yihiin bartilmaameed milateri oo waqti kasta weeraro lala beegsan karo.
