MUQDISHO — Musharrax Xildhibaan Cabdiqaadir Maxamed Nuur Jaamac ayaa ku guuleystay doorashada Guddoomiyaha Golaha Shacabka ee Baarlamaanka Federaalka Soomaaliya, kaddib markii uu helay cod aqlabiyad ah oo dhan 142 cod.
Natiijada doorashada ayaa muujineysa in Cabdiqaadir Maxamed Nuur Jaamac uu si cad uga adkaaday musharraxa la tartamayay, Xildhibaan Cabdiqaadir Cumar Macallin Daada, oo isna helay 30 cod.Sida natiijada lagu dhawaaqay, labada musharrax ayaa codadka baarlamaanka u galay doorasho lagu go’aaminayay qofka hoggaaminaya Golaha Shacabka, iyadoo xubnaha Golaha ay codkooda ku kala doorteen musharraxiinta u taagan xilka Guddoomiyaha.
Natiijada codadka-
Cabdiqaadir Maxamed Nuur Jaamac: 142 cod-
Cabdiqaadir Cumar Macallin Daada: 30 cod
Guusha Cabdiqaadir Maxamed Nuur Jaamac ayaa ka dhigan in uu hoggaanka Golaha Shacabka kala wareegayo guddoomiyihii hore, waxaana laga filayaa in uu hoggaamiyo howlaha sharci-dejinta, kulamada Golaha iyo xiriirka Golaha Shacabka iyo hay’adaha kale ee dowladda.
Doorashadan ayaa kusoo beegmeysa xilli Golaha Shacabka uu wajahayo arrimo siyaasadeed iyo sharci-dejin oo muhiim u ah dalka, kuwaas oo ay ka mid yihiin howlaha la xiriira xoojinta hay’adaha dowladda, ansixinta sharciyada iyo la xisaabtanka hay’adaha fulinta.
Guusha uu gaaray Cabdiqaadir Maxamed Nuur Jaamac waxay sidoo kale muujineysaa taageerada ballaaran ee uu ka helay xubnaha Golaha Shacabka ee ka qeyb galay codeynta.
Guddoomiyaha cusub ayaa hadda wajahaya mas’uuliyadda hoggaaminta Golaha, ilaalinta nidaamka iyo habsami-u-socodka fadhiyada, iyo isku keenidda xildhibaannada si Golaha Shacabka uu u gudto waajibaadkiisa dastuuriga ah.
Warsan Radio waxay idiin soo gudbin doontaa wixii warar iyo faahfaahin dheeraad ah ee kasoo baxa doorashadan, oo ay ku jiraan khudbadda Guddoomiyaha cusub, hadallada musharraxa laga guuleystay iyo jawaabaha siyaasiyiinta iyo xildhibaannada aad kala socon doontaan baraheena bulshada.
