Hoggaamiyaha Maamulka Koonfur Galbeed Soomaaliya, Sheekh Aadan Maxamed Nuur (Madoobe), ayaa magaalada Muqdisho kulan kula yeeshay Safiirka Turkiga u fadhiya Soomaaliya, Danjire Alper AktaΕ, iyadoo diiradda lagu saaray xoojinta xiriirka iyo iskaashiga labada dhinac.
Kulanka ayaa looga hadlay xaaladda guud ee Koonfur Galbeed, gaar ahaan amniga, horumarinta adeegyada bulshada, kaabeyaasha dhaqaalaha iyo arrimaha baniβaadannimada.
Sheekh Aadan Madoobe ayaa uga mahadceliyay dowladda iyo shacabka Turkiga taageerada ay siiyaan Soomaaliya, gaar ahaan deegaannada Koonfur Galbeed, isagoo xusay doorka Ankara ee taageerada adeegyada aasaasiga ah iyo dadaallada dib-u-dhiska dalka.
Hoggaamiyaha Koonfur Galbeed ayaa sidoo kale Danjiraha la wadaagay xaaladda ka jirta deegaannada maamulka iyo dadaallada lagu xoojinayo amniga, horumarinta adeegyada bulshada, kobcinta dhaqaalaha iyo abuurista fursado horumarineed oo waara.
Labada dhinac ayaa sidoo kale ka wada hadlay sidii loo sii xoojin lahaa wada-shaqeynta Koonfur Galbeed iyo dowladda Turkiga, iyadoo mudnaanta la siinayo mashaariicda iyo taageerada si toos ah uga qayb qaadan karta xasilloonida iyo horumarka bulshada.
Kulankan ayaa qayb ka ah kulamo shaqo oo uu Sheekh Aadan Madoobe Muqdisho kula yeelanayo madaxda dowladda federaalka, diblomaasiyiinta iyo hayβadaha caalamiga ah, kuwaas oo la xiriira sidii loo xoojin lahaa iskaashiga iyo taageerada horumarineed ee Koonfur Galbeed.
Shirka waxaa sidoo kale ka qaybgalay Wasiirka Beeraha iyo Agaasimaha Guud ee Madaxtooyada Koonfur Galbeed Soomaaliya.
