Baydhabo, 12 Agoosto 2026 — Wasiirka Wasaaradda Arrimaha Gudaha, Dowladaha Hoose iyo Dib-u-heshiisiinta Koonfur Galbeed Soomaaliya, Mudane Cabdiraxmaan Ibraahim Aadan (Sate), ayaa Ibraahim Maxamed Nuur (Kalaay) u magacaabay Guddoomiyaha Degmada Baydhabo ahna Duqa Magaalada Baydhabo.
Magacaabistan ayaa lagu shaaciyay qoraal rasmi ah oo kasoo baxay Xafiiska Wasiirka Wasaaradda Arrimaha Gudaha, Dowladaha Hoose iyo Dib-u-heshiisiinta Koonfur Galbeed Soomaaliya, kaas oo ku taariikhaysan 12-ka Agoosto 2026, kuna xusan tixraaca DKGS/XW/WAG&DH/00110/2026.
Qoraalka ayaa sidoo kale lagu magacaabay masuuliyiin kale oo ka howlgalaya maamulka degmada Baydhabo, kuwaas oo kala ah:-
Faysal Maxamed Duuble – Guddoomiye Ku-xigeenka Amniga iyo Siyaasadda.
– Xasan Aadan Nuur – Guddoomiye Ku-xigeenka Maamulka iyo Maaliyadda.
– Caddow Aadan Nuuroow – Guddoomiye Ku-xigeenka Arrimaha Bulshada.
– Siidow Jeelle Ibraahim – Xoghaye Dawladda Hoose ee Degmada Baydhabo.
Wasaaradda ayaa sheegtay in magacaabista ay qeyb ka tahay maareynta iyo habsami-u-socodka maamulka degmada Baydhabo, iyadoo masuuliyiinta cusub loo xilsaaray inay gutaan waajibaadkooda shaqo.
Wasiirku wuxuu masuuliyiinta cusub kula dardaarmay inay si wanaagsan u gutaan waajibaadkooda, isla markaana ay ka shaqeeyaan adeegyada iyo maamulka degmada, iyadoo qoraalka lagu sheegay in sidoo kale la qiimeyn doono waxqabadka masuuliyiinta iyo shaqada ay u hayaan bulshada.
Magacaabistan ayaa imaanaysa xilli Baydhabo ay tahay xarunta maamulka Koonfur Galbeed Soomaaliya iyo magaalo muhiim u ah dhinacyada maamulka, adeegyada bulshada iyo siyaasadda gobolka.
Warsan Radio ayaa sii wadi doonta la socodka tallaabooyinka xiga ee la xiriira magacaabistan iyo howlaha maamulka cusub ee Degmada Baydhabo.
hoos ka aqriso wareegtada Magacaawista
