Hoggaamiyaha Koonfur Galbeed Soomaaliya, Mudane Aadan Maxamed Nuur (Aadan Madoobe), ayaa hambalyo iyo duco u diray guud ahaan ardayda Soomaaliyeed ee ku guuleysatay Imtixaanka Shahaadiga ah ee Dugsiga Sare ee sanad-dugsiyeedka 2025/2026, gaar ahaan ardayda Koonfur Galbeed ee kaalmaha sare ka galay natiijada imtixaanka.
Sheekh Aadan Madoobe ayaa si gaar ah hambalyo iyo bogaadin ugu diray Idiris Nuur Abiikar iyo Deeqa Cali Mukhtaar, oo ka mid noqday 10-ka arday ee ugu sarreeya Imtixaanka Qaranka ee sanadkan.
Wuxuu sheegay in guusha ay ardaydan gaareen ay tahay mid sharaf iyo farxad u ah waalidiintooda, macallimiintooda iyo guud ahaan bulshada Soomaaliyeed, gaar ahaan shacabka Koonfur Galbeed.
“Waxaan Alle uga baryayaa dhammaan ardayda guulaysatay inuu cilmigooda u barakeeyo, una fududeeyo marxaladaha waxbarasho ee xiga,” ayuu yiri Aadan Madoobe.
Sidoo kale, wuxuu farriin dhiirrigelin ah u diray ardayda aan ku guuleysan natiijada imtixaanka, isagoo kula dardaarmay in aysan quusan, balse ay sii wadaan dadaalka iyo waxbarashada, maadaama ay weli horyaallaan fursado badan oo ay mustaqbalkooda ku horumarin karaan.
Natiijada Imtixaanka Qaranka ee sanad-dugsiyeedka 2025/2026 ayaa muujisay in ardayda Koonfur Galbeed ay kaalin muuqata ka qaateen kaalmaha sare, taasoo sare u qaadaysa rajada laga qabo horumarka waxbarashada iyo tayada ardayda ka soo baxaysa dugsiyada sare ee deegaannada maamulka.
Hambalyada Hoggaamiyaha Koonfur Galbeed ayaa kusoo beegmaysa xilli ardayda, waalidiinta iyo macallimiintu ay u dabaaldegayaan natiijada imtixaanka, iyadoo guulaha ay gaareen ardayda kaalmaha hore ay dhiirrigelin u noqon karaan jiilka kale ee waxbarashada ku jira.
