Munaasabad xil-wareejin ah oo maanta ka dhacday magaalada Baydhabo ayaa si rasmi ah loogu kala wareejiyay xilka Guddoomiyaha Degmada Baydhabo ahna Duqa Magaalada.
Gudoomiye Ibraahim Maxamed Nuur (Kalaay), oo dhawaan loo magacaabay Guddoomiyaha Degmada Baydhabo, ayaa si rasmi ah ula wareegay xilka, kaddib munaasabad ay ka qaybgaleen mas’uuliyiin ka tirsan maamulka degmada, qaybaha kala duwan ee bulshada iyo marti sharaf kale.
Munaasabadda ayaa diiradda lagu saaray muhiimadda ay leedahay in maamulka cusub uu sii ambaqaado howlaha horumarineed ee degmada, isla markaana uu xoojiyo wada-shaqeynta maamulka iyo shacabka.
Guddoomiyaha cusub ee Degmada Baydhabo, Ibraahim Maxamed Nuur (Kalaay), ayaa sheegay in mudnaanta koowaad uu siin doono horumarinta adeegyada bulshada, sugidda amniga, nadaafadda magaalada iyo xoojinta maamulka degmada.
Waxa uu sidoo kale ballanqaaday inuu si hufan oo masuuliyad leh uga shaqeyn doono waajibaadka loo igmaday, isagoo tilmaamay in wada-shaqeynta bulshada ay muhiim u tahay horumarinta magaalada Baydhabo.
Xilka Guddoomiyaha Degmada Baydhabo ayaa ah mid muhiim u ah maamulka iyo adeegyada bulshada, iyadoo laga sugayo maamulka cusub inuu wax ka qabto baahiyaha shacabka iyo horumarinta adeegyada aasaasiga ah ee magaalada.
Munaasabadda xil-wareejinta ayaa kusoo dhammaatay jawi wanaagsan, iyadoo mas’uuliyiinta iyo bulshada ka qaybgalay ay Guddoomiyaha cusub ugu rajeeyeen inuu si guul leh u guto xilka loo igmaday.
Halkan hoose ka daawo kalmada gudoomiyaha
