Ibraahim Hareeri, oo ah xildhibaan ka tirsan Golaha Deegaanka degmada Waajid isla markaana lagu sheegay inuu taageero u yahay Madaxweynahii hore Koonfur Galbeed Cabdicasiis Xasan Maxamed Laftagareen, ayaa hadal adag ka soo saaray ciidamada Dowladda Federaalka ee ku sugan magaalada Baydhabo.
Hareeri ayaa sheegay in ciidamadiisa ay diyaar u yihiin inay la dagaallamaan ciidamada Federaalka, kuwaas oo uu ku eedeeyay in Muqdisho looga soo diray sidii ay ula wareegi lahaayeen maamulka iyo amniga magaalada Baydhabo.
“Ama dagaal ayaa dhacaya, ama ciidamada magaalada soo galay waa inay baxaan,” ayuu yiri Ibraahim Hareeri.
Waxa kale oo uu digniin u diray milkiilayaasha dhismayaasha dhaadheer ee Baydhabo, isagoo sheegay in haddii ciidamada Federaalka ay dhismayaashaas ka dhigtaan goobo ay ka abaabulaan hawlgallo militari, ay dhici karto in la bartilmaameedsado.
Hadalkan ayaa walaac cusub ka dhaliyay badqabka shacabka iyo hantida gaarka loo leeyahay haddii dagaal gudaha magaalada ka qarxo.
Hareeri ayaa sidoo kale beeniyay eedeymaha sheegaya in kooxdiisu ay xiriir la leedahay Al-Shabaab.
“Kuwa nagu sheegay Al-Shabaab way qaldan yihiin.
Annagu Al-Shabaab ma nihin.
Waxaan u joognaa inaan Baydhabo ka xoreyno ciidamada Xasan Sheekh ee Muqdisho ka yimid,” ayuu yiri.
Hadalka Ibraahim Hareeri ayaa kusoo aadaya xilli Baydhabo ay ka jirto xiisad siyaasadeed iyo mid amni oo u dhexeysa Dowladda Federaalka iyo maamulka Koonfur Galbeed, iyadoo cabsi laga qabo in khilaafka siyaasadeed uu isu beddelo iska horimaad hubeysan.
Digniinta ku saabsan dhismayaasha dhaadheer ayaa si gaar ah walaac u leh shacabka, maadaama dagaal ka dhaca gudaha Baydhabo uu sababi karo khasaaro naf iyo maalba leh, isla markaana uu saameyn ku yeelan karo dadka rayidka ah ee aan ku lug lahayn khilaafka.
Xaaladda Baydhabo ayaa weli ah mid xasaasi ah, waxaana muhiim ah in dhinacyada isku haya magaalada ay mudnaanta siiyaan wadahadal iyo xal siyaasadeed, si looga fogaado dagaal cusub oo ay shacabka Koonfur Galbeed khasaaraha ugu badan ka qaadaan.
