Wasiirka Arrimaha Dibadda iyo Iskaashiga Caalamiga ah ee Soomaaliya, Cabdisalaan Cabdi Cali Dhaay, ayaa qaabilay nuqullada waraaqaha aqoonsiga ee safiirrada cusub ee Mali, Nigeria, Pakistan iyo Myanmar u qaabilsan Soomaaliya.
Safiirrada cusub ayaa munaasabadda ku guddoonsiiyay Wasiirka nuqullada waraaqahooda aqoonsiga, taas oo si rasmi ah u asteyneysa bilowga howlahooda diblomaasiyadeed ee Soomaaliya.
Kulanka ayaa muujinaya sida Soomaaliya ay uga go’an tahay xoojinta xiriirrada diblomaasiyadeed iyo iskaashiga ay la leedahay dalalka caalamka, gaar ahaan dhinacyada siyaasadda, dhaqaalaha, amniga iyo horumarinta.
Wasaaradda Arrimaha Dibadda ayaa sidoo kale tilmaantay muhiimadda ay leedahay in la sii adkeeyo xiriirka laba geesoodka ah ee Soomaaliya la leedahay Mali, Nigeria, Pakistan iyo Myanmar, iyadoo la raadinayo fursado cusub oo lagu kobcin karo iskaashiga labada dhinac.
Soo dhoweynta safiirrada cusub waxay qeyb ka tahay dadaallada dowladda Soomaaliya ay ku ballaarineyso xiriirkeeda caalamiga ah iyo xoojinta doorka dalka ee diblomaasiyadda gobolka iyo tan caalamka.
