London – Jaaliyadda Koonfur Galbeed ee ku nool magaalada London ee cariga boqortooyada ingiriiska ayaa walaac xooggan ka muujisay xaaladda amni iyo siyaasadeed ee ka soo cusboonaatay magaalada Baydhabo xarunta gobolka Bay iyo tan guud ahaan kajirta deegaanada maamulka koonfur galbeed soomaaliya.
Walaaca jaaliyadda ayaa soo baxay xilli Baydhabo ay toddobaadyadii u dambeeyay ka jireen xiisado siyaasadeed iyo iska horimaadyo hubeysan oo u dhexeeya dhinacyo kala duwan.
Wararka soo baxay 17-kii Agoosto ayaa sheegay in magaalada uu ka dhacay dagaal culus, iyadoo ciidamada dowladda Federaalka iyo kuwa dhinacyada siyaasadda ku loollamaya ay isku dhaceen.
Jaaliyaddu waxay sheegtay in xaaladda noocaas ah ay si toos ah u saameyn karto shacabka, ganacsatada, ardayda iyo dadka nugul ee ku nool Baydhabo, waxayna ku baaqday in laga fogaado tallaabo kasta oo horseedi karta dagaal iyo qalalaase hor leh.
Waxay sidoo kale ku boorrisay dhinacyada siyaasadda iyo hoggaanka Koonfur Galbeed in khilaafaadka jira lagu xalliyo wada-hadal, is-qancin iyo hannaan siyaasadeed, halkii loo adeegsan lahaa awood ciidan.
Baydhabo ayaa muddooyinkii dambe wajahaysay isku-dar xiisad siyaasadeed iyo walaac amni.
Maamulka Koonfur Galbeed ayaa hore u soo saaray go’aanno lagu xoojinayo ammaanka magaalada, oo ay ka mid yihiin nidaaminta hubka iyo dhaq-dhaqaaqa gaadiidka dagaalka gudaha magaalada.
Dhanka kale, shirar amni oo joogto ah ayaa ka dhacay Baydhabo, iyadoo mas’uuliyiinta amniga ay sheegeen in la xoojinayo wada-shaqeynta ciidamada iyo shacabka iyo sugidda amniga magaalada.
Jaaliyadda Koonfur Galbeed ee London ayaa ugu dambeyn ugu baaqday Dowladda Federaalka, maamulka Koonfur Galbeed, siyaasiyiinta iyo waxgaradka deegaanka inay mudnaanta koowaad siiyaan badbaadada shacabka iyo xasilloonida Baydhabo, isla markaana ay qaadaan tallaabo degdeg ah oo lagu dejinayo xiisadda.
**Jaaliyaddu waxay ku adkeysatay in Baydhabo ay u baahan tahay nabad, wada-hadal iyo xasillooni, si shacabka looga badbaadiyo saameynta khilaafaadka siyaasadeed iyo kuwa amni.**
https://www.facebook.com/share/v/1EYQkuz75e/
