Wasiirka Warfaafinta, Dhaqanka iyo Dalxiiska Soomaaliya, Mudane Cabdifataax Qaasim Maxamuud, ayaa ka qaybgalay furitaanka Madasha 7-aad ee Iskaashiga Warbaahinta Shiinaha iyo Afrika, oo lagu qabtay magaalada Beijing ee dalka Shiinaha.
Madasha waxaa isugu yimid wasiirrada warfaafinta, madaxda hay’adaha warbaahinta iyo mas’uuliyiin sare oo ka kala socday dalal badan oo Afrika iyo Shiinaha ah.
Shirkan ayaa diiradda lagu saaray xoojinta iskaashiga warbaahineed ee u dhexeeya Afrika iyo Shiinaha, horumarinta iyo casriyeynta hay’adaha warbaahinta, adeegsiga tiknoolajiyadda cusub, kobcinta xirfadaha shaqaalaha warbaahinta iyo is-dhaafsiga khibradaha.
Wasiir Cabdifataax Qaasim ayaa la filayaa inuu madasha ka jeediyo khudbad uu kaga hadlayo horumarinta warbaahinta gobolka, iskaashiga Soomaaliya iyo Shiinaha ee dhinaca warbaahinta iyo muhiimadda ay leedahay dhisidda awoodda hay’adaha warbaahinta Soomaaliyeed.
Ka qaybgalka Soomaaliya ee madashan ayaa fursad u siinaya dowladda inay la wadaagto dalalka Afrika iyo Shiinaha waayo-aragnimada Soomaaliya ee dhinaca warbaahinta, iyadoo sidoo kale la filayo in laga faa’iidaysto fursadaha tababarrada, tiknoolajiyadda iyo horumarinta xirfadaha warbaahinta.
Madasha ayaa sidoo kale muhiim u ah xoojinta xiriirka iyo iskaashiga Soomaaliya iyo Shiinaha, gaar ahaan dhinacyada warbaahinta, dhaqanka iyo is-dhaafsiga khibradaha.
Soomaaliya waxay madashan u aragtaa fursad lagu horumarin karo hay’adaha warbaahinta dalka, kor loogu qaadi karo xirfadaha bahda warbaahinta, laguna heli karo tiknoolajiyado casri ah oo gacan ka geysta horumarinta warbaahinta Soomaaliyeed.
