Wasiirka Wasaaradda Warfaafinta, Dhaqanka iyo Dalxiiska Xukuumadda Federaalka Soomaaliya, Mudane Cabdifitaax Qaasim Maxamuud, oo booqasho rasmi ah ku jooga dalka Shiinaha, ayaa maanta oo Jimce ah booqday qaar ka mid ah xarumaha ugu waaweyn ee wax-soo-saarka warbaahinta iyo fanka ee magaalada Beijing.
Booqashada Wasiirka ayaa diiradda lagu saaray sidii loo ogaan lahaa horumarka tiknoolajiyadda, tayada qalabka casriga ah iyo hababka cusub ee loo adeegsado wax-soo-saarka warbaahinta iyo fanka.
Wasiir Cabdifitaax Qaasim ayaa si gaar ah u daneynayay qalabka iyo teknoolojiyadda casriga ah ee loo adeegsado duubista, baahinta iyo soo saarista barnaamijyada warbaahinta, iyadoo ujeeddadu tahay in Soomaaliya ay ka faa’iideysato khibradda iyo horumarka Shiinaha ee dhinacyadan.
Intii uu ku guda jiray kormeerka, Wasiirka ayaa waqti gaar ah geliyay barashada qalabkii ugu dambeeyay ee warbaahinta iyo fanka, iyo sidoo kale aaladaha casriga ah ee lagu shaqeeyo.
Wasaaradda Warfaafinta ayaa sheegtay in dadaalladan ay qayb ka yihiin qorshe lagu casriyeynayo Warbaahinta Qaranka Soomaaliyeed, iyadoo sidoo kale fiiro gaar ah loo siinayo baahiyaha fanaaniinta iyo Hoballada Qaranka ee Waaberi.
Booqashada ayaa sidoo kale muujinaysa muhiimadda ay Soomaaliya siinayso iskaashiga dhinacyada warbaahinta, dhaqanka, fanka iyo tiknoolajiyadda, iyadoo laga faa’iideysanayo khibradda iyo horumarka Shiinaha.
Wasiirka ayaa la filayaa in socdaalkiisa uu qayb ka noqdo dadaallada lagu horumarinayo tayada iyo awoodda hay’adaha warbaahinta Soomaaliya, gaar ahaan dhinacyada qalabka, wax-soo-saarka iyo adeegsiga teknoolojiyadda casriga ah.
