Guddoomiyaha Golaha Shacabka Baarlamaanka Jamhuuriyadda Federaalka Soomaaliya ayaa maanta guddoomiyey Kulanka 5-aad ee Kalfadhiga 8-aad ee Golaha Shacabka, kaas oo looga hadlay ajendayaal muhiim ah oo la xiriira ilaalinta xuquuqda shacabka, danaha qaranka iyo xoojinta dowladnimada.
Kulanka ayaa Akhrinta Koowaad lagu mariyey Heshiiska Qaramada Midoobay ee Sharciga Badaha (UNCLOS), gaar ahaan heshiiska ku saabsan Ilaalinta iyo Isticmaalka Waara ee Kala-duwanaanshaha Noolaha Badda ee Aagagga ka Baxsan Awoodda Qaranka (BBNJ Agreement).
Sidoo kale, Xildhibaannada Golaha Shacabka ayaa loo qaybiyey afar Hindise-Sharciyeed oo cusub, kuwaas oo kala ah:
1. Hindise-Sharciyeedka Arrimaha Qoyska.
2. Hindise-Sharciyeedka Xuquuqda Carruurta.
3. Hindise-Sharciyeedka Dhismaha Hay’adda Culimada Soomaaliyeed.
4. Hindise-Sharciyeedka Dambiyada Kufsiga iyo Anshax-xumada Kale.
Dhanka kale, waxaa mudanayaasha loo qaybiyey warbixinta Akhrinta Saddexaad ee Hindise-Sharciyeedka wax-ka-beddelka Qeybta 6-aad ee Sharciga Iibka Qaranka, kaas oo ka mid ah hindisayaasha sharciyeed ee horyaalla Golaha.
Kulanka ayaa qeyb ka ah dadaallada Baarlamaanka Federaalka Soomaaliya ee ku aaddan dhameystirka iyo horumarinta shuruucda dalka, ilaalinta xuquuqda muwaadiniinta iyo xoojinta hay’adaha dowliga ah.
