Ra’iisul Wasaaraha Xukuumadda Federaalka Soomaaliya, Mudane Hamza Abdi Barre, ayaa ka qeyb galay munaasabad qalin-jabin ah oo lagu qabtay Mogadishu University, halkaas oo lagu maamuusay arday dhammaystay heerar kala duwan oo waxbarashada sare ah.
Ra’iisul Wasaaraha ayaa hambalyo u diray ardayda qalin-jabisay, isagoo ku boorriyay inay aqoonta iyo xirfadaha ay kasbadeen u adeegsadaan horumarinta dalka, bulshada iyo dhaqaalaha Soomaaliya.
Ra’iisul Wasaare Xamza ayaa sheegay in Dowladda DanQaran ay mudnaan gaar ah siinayso tayeynta waxbarashada iyo abuurista fursado shaqo oo ay helaan dhalinyarada Soomaaliyeed ee waxbaratay.
Waxa uu sidoo kale carrabka ku adkeeyay muhiimadda ay leedahay in waxbarashada dalka lagu waafajiyo baahiyaha suuqa shaqada.
Waxa uu tilmaamay in xiriir wanaagsan oo ka dhexeeya jaamacadaha, xarumaha waxbarashada iyo suuqa shaqadu uu muhiim u yahay sidii dhalinyarada Soomaaliyeed loogu diyaarin lahaa xirfado si toos ah uga jawaabaya baahiyaha dalka.
Munaasabadda iyo xafladda qalin jebinta ayaa sidoo kale muujisay doorka ay dhalinyarada aqoonta leh ku leeyihiin dib-u-dhiska iyo horumarinta Soomaaliya, iyadoo dowladda iyo hay’adaha waxbarashada lagu dhiirrigeliyay inay sii xoojiyaan fursadaha waxbarasho, tababarro xirfadeed iyo shaqo-abuurka dhalinyarada.
