Sanduuqa Caalamiga ah ee Waxbarashada Xilliyada Dhibaatada ee Qaramada Midoobay, Education Cannot Wait (ECW), ayaa ku dhawaaqay maalgelin cusub oo dhan 22 milyan oo doollar, taas oo loogu talagalay in ku dhowaad 200,000 oo carruur iyo dhallinyaro reer Suudaan ah loogu abuuro fursado waxbarasho oo ammaan ah, tayo leh oo loo dhan yahay.
Maalgelintan oo soconaysa saddex sano ayaa si gaar ah looga fulin doonaa gobollada Galbeedka Darfur, Koonfurta Kordofan iyo Gedaref, oo kamid ah meelaha ay si weyn u saameeyeen dagaalka, barakaca iyo burburka adeegyada bulshada.
ECW waxay sheegtay in tan iyo markii uu dagaalka Suudaan billowday Abriil 2023, ku dhowaad 14 milyan oo qof ay guryahooda ka barakaceen, halka 33.7 milyan oo qof ay hadda u baahan yihiin kaalmo bani’aadannimo.
Sidoo kale, ugu yaraan 8 milyan oo carruur ah ayaa ka maqnaanaya waxbarashada.
Barnaamijkan cusub wuxuu diiradda saari doonaa dib-u-dhiska iyo abuurista goobo waxbarasho oo ammaan ah, taageerada caafimaadka maskaxda iyo nafsiyeed ee carruurta, tababarka macallimiinta, bixinta agabka waxbarashada iyo sidii loo yareyn lahaa caqabadaha hortaagan gabdhaha iyo carruurta qaba naafanimada.
Ugu yaraan 60% carruurta ka faa’iidaysanaysa barnaamijka ayaa noqon doona gabdho, halka 10% loo qorsheeyay carruurta qaba naafanimada. Waxaa sidoo kale jira $5 milyan oo kayd degdeg ah oo loo adeegsan karo xaaladaha cusub ee bani’aadannimo iyo dhibaatooyinka la xiriira cimilada.
Hirgelinta barnaamijka waxaa hoggaamin doona Save the Children, iyadoo lala kaashanayo Plan International, LM International iyo hay’ado maxalli ah oo ay kamid yihiin Alsalam Organisation for Relief and Development iyo Sadagaat.
Ku dhowaad 48% miisaaniyadda ayaa loo qoondeeyay hay’adaha qaranka iyo kuwa maxalliga ah, si xalalka waxbarashadu ugu salaysnaadaan baahiyaha bulshada Suudaan.
ECW waxay tilmaantay in $22-ka milyan uu yahay maalgelin bilow ah, halka barnaamijka guud uu u baahan yahay qiyaastii $39 milyan, taasoo ka dhigan in weli loo baahan yahay dhaqaale dheeraad ah si loo ballaariyo taageerada.
Saameynta dagaalka ee waxbarashadaDagaalka Suudaan ayaa si weyn u carqaladeeyay waxbarashada malaayiin carruur ah.
Carruur badan ayaa muddo dheer ka maqnaa fasallada, iyadoo qaar ay lumiyeen ku dhowaad 500 maalmood oo waxbarasho ah.
Sidaas darteed, ECW waxay sheegtay in taageeradu aysan ku koobnaan doonin dib-u-furista dugsiyada oo keliya, balse ay sidoo kale diiradda saari doonto badbaadada carruurta, soo celinta rajada iyo xoojinta nidaamka waxbarashada si uu uga shaqeyn karo xaaladaha colaadda iyo xilliga soo kabashada.
Maalgelintan ayaa kusoo beegmaysa xilli ECW ay bilowday ololaha caalamiga ah ee “Hope Starts Here”, kaas oo lagu doonayo in lagu ururiyo $600 milyan si waxbarasho loo gaarsiiyo 10 milyan oo carruur ah oo ku nool meelaha ay saameeyeen dhibaatooyinka iyo colaadaha adduunka.
Warbixin: Warsan Radio
