Isbahaysiga Bulshada Rayidka Soomaaliyeed ee SONSA ayaa si adag u cambaareeyay barakicinta qasabka ah ee lagu sameynayo qaar ka mid ah qoysaska ku nool magaalada Muqdisho.
SONSA ayaa ugu baaqay hay’adaha dowladda inay si degdeg ah u joojiyaan barakicinta sharci-darrada ah, isla markaana ay ilaaliyaan qoysaska ay saameeyeen tallaabooyinkan.
Ururku wuxuu sidoo kale dalbaday in si madax-bannaan loo baaro eedeymaha la xiriira qabsashada dhulalka, ku takri-falka awoodda iyo xadgudubyada ka dhanka ah shacabka, si loo xaqiijiyo cidda mas’uulka ka ah iyo in tallaabo sharci ah laga qaado cid kasta oo lagu helo dambiga.
SONSA waxay xustay in murannada dhulka iyo guryaha lagu xalliyo habraacyo sharci ah, hufan, caddaalad ah oo dhexdhexaad ah, iyadoo la dhowrayo xuquuqda dadka ay khuseyso.
Arrintan ayaa kusoo beegmaysa xilli Muqdisho ay ka jiraan muranno la xiriira lahaanshaha dhulka iyo guryaha, kuwaas oo saameyn ku yeelan kara qoysas badan.
Bulshada rayidka ah ayaa dowladda ugu baaqaysa inay mudnaanta siiso ilaalinta shacabka, xallinta khilaafaadka iyo ka hortagga barakicin aan waafaqsanayn sharciga.
SONSA ayaa adkeysay in ilaalinta xuquuqda dadka iyo ku dhaqanka sharcigu ay muhiim u yihiin xasilloonida, kalsoonida shacabka iyo dowladnimada.
