Wasiirka Boqortooyada Midowday (UK) u qaabilsan Horumarinta iyo Afrika, Kirsty McNeill, ayaa booqasho ku tagtay xarun bani’aadamnimo oo Soomaaliya ku taalla, iyadoo halkaas lagu soo bandhigay xaaladda cunto-yarida, nafaqo-darrada iyo hawlaha gargaarka ee dalka.
Booqashada ayaa qeyb ka ahayd kulamo looga hadlayay xaaladda bani’aadamnimo ee Soomaaliya iyo sida loo xoojin karo taageerada loo fidiyo dadka nugul, iyadoo mas’uuliyiinta World Food Programme (WFP) ay soo bandhigeen xog cusub oo ku saabsan xaaladda cunto iyo nafaqo ee Soomaaliya.
Sida xogta lagu soo bandhigay, 6 milyan oo qof, oo u dhiganta 31% dadka Soomaaliya, ayaa hadda wajahaya cunto-yari ba’an oo gaartay heerka IPC 3 ama ka sarreeya.
Waxaa ka mid ah 4.1 milyan oo qof oo ku jira IPC 3 (Crisis) iyo 1.9 milyan oo ku jira IPC 4 (Emergency).Waxaa sidoo kale la sheegay in ku dhowaad 1.9 milyan oo carruur ah oo da’doodu u dhaxayso 6 ilaa 59 bilood ay sanadkan wajahayaan nafaqo-darro ba’an.
Warbixinta ayaa si gaar ah uga digtay khatarta macaluul oo ka dhalan karta qaybo ka mid ah Soomaaliya dhammaadka 2026.
FEWS NET waxay tilmaantay khatar macquul ah oo macaluul ah oo ka jirta Bay, Bakool, Gedo iyo Hiiraan, iyo deegaanada xoolo-dhaqatada ee waqooyiga iyo bartamaha dalka.
Buurhakaba ayaa ka mid ah meelaha walaaca gaarka ah laga muujiyay, iyadoo heerka Global Acute Malnutrition uu halkaas dhaafay 30%, heer loo arko mid si weyn ula xiriira xaaladaha macaluusha.
Mas’uuliyiinta ayaa sidoo kale ka hadlay sababaha sii xoojinaya xaaladda bani’aadamnimo, kuwaas oo ay ka mid yihiin colaadaha iyo amni-darrada, saameynta isbeddelka cimilada, hoos u dhaca maalgelinta gargaarka bani’aadamnimo iyo cadaadiska dhaqaale.
Sawirrada laga qaaday xarunta ayaa sidoo kale muujinaya hawlaha Logistics Cluster ee Soomaaliya, oo ay ka mid yihiin gaarsiinta iyo kaydinta sahayda bani’aadamnimo, isku-duwidda hay’adaha iyo taageerada goobaha u baahan gargaarka.
Booqashada UK waxay ku soo beegmaysaa xilli Soomaaliya ay wajaheyso baahi bani’aadamnimo oo sii kordheysa, taas oo muujinaysa muhiimadda ay leedahay in la joogteeyo taageerada caalamiga ah iyo maalgelinta gargaarka si loo gaarsiiyo dadka ay sida daran u saameeyeen cunto-yarida iyo nafaqo-darradu.
dhanka kale Ra’iisul Wasaare Ku-xigeenka Soomaaliya iyo Wasiir UK ah oo Booqday Bakhaar WFP ku Leedahay Muqdisho
Ra’iisul Wasaare Ku-xigeenka Soomaaliya, Saalax Axmed Jaamac, iyo Wasiirka Boqortooyada Midowday u qaabilsan Horumarinta iyo Afrika, Kirsty McNeill, ayaa booqday bakhaar ay Hay’adda Cunnada Adduunka (WFP) ku leedahay magaalada Muqdisho.
Labada mas’uul ayaa halkaasi lagu tusay sahayda bani’aadamnimo ee loo diyaariyey qoysaska ay saameeyeen abaaraha, iyo nidaamka loo adeegsado diiwaangelinta dadka ka faa’iideysanaya gargaarka.
WFP ayaa sharaxday in qof kasta oo la diiwaangeliyo laga qaado xogta biometriga ah, kadibna la siiyo kaar la xaqiijiyay oo laga aqoonsan yahay hay’adaha Qaramada Midoobay. Nidaamkan ayaa looga gol leeyahay in laga hortago in qof ama qoys gargaar isku mid ah ka helo hay’ado kala duwan, iyadoo la yareynayo is-dul-saarka gargaarka.
Ra’iisul Wasaare Ku-xigeenka Saalax Axmed Jaamac ayaa sheegay in deegaannada sida daran ay u saameeyeen xaaladda abaartu ay yihiin kuwo ka mid ah deegaannada ugu nabdoon dalka, sidaas darteedna amni-darradu aysan ahayn sababta ugu weyn ee keentay xaaladda bani’aadamnimo ee hadda jirta.
Wuxuu sheegay in dhibaatada ay si weyn uga dhalatay isbeddellada cimilada iyo roobab la’aanta soo noqnoqotay, kuwaas oo is biirsaday xilliyo badan oo xiriir ah, taasoo wiiqday noloshii iyo hab-nololeedkii bulshada.
Ra’iisul Wasaare Ku-xigeenka ayaa sidoo kale ku dhawaaqay in dowladda Soomaaliya ay bisha soo socota si rasmi ah u daah-furi doonto mashruuca kaydinta raashinka ee Jowhar, kaas oo la filayo inuu qeyb ka noqdo dadaallada lagu xoojinayo awoodda dalka ee kaydinta iyo maaraynta sahayda cuntada.
Booqashadan ayaa ku soo beegmaysa xilli Soomaaliya ay wajahaysid xaalad cunto-yari iyo nafaqo-darro oo sii kordheysa, iyadoo hay’adaha gargaarku ay ku baaqayaan in la xoojiyo taageerada loo fidinayo qoysaska ay saameeyeen abaaraha iyo dhibaatooyinka cimilada.
Sidoo kale Dowaladda 🇬🇧 UK oo ballanqaadday taageero dheeraad ah oo Soomaaliya ah
Wasiirka Horumarinta iyo Afrika ee Boqortooyada Midowday, Kirsty McNeill, ayaa kulan la yeelatay hoggaamiyeyaasha UNSOS iyo AUSSOM, iyadoo diiradda lagu saaray taageerada caalamiga ah iyo amniga Soomaaliya.
Boqortooyada Midowday ayaa sheegtay inay diyaar u tahay inay taageero dheeraad ah siiso UNSOS, oo door muhiim ah ku leh taageerada hawlaha amniga Soomaaliya.
UK waxay sidoo kale carrabka ku adkeysay in horumar laga sameeyo wada-hadalka siyaasadeed ee dhammaan hoggaamiyeyaasha Soomaaliyeed, iyo in la caddeeyo qorshayaasha ku saabsan marxaladda kala-guurka amniga Soomaaliya, ay muhiim u noqon doonaan go’aannada mustaqbalka ee ku saabsan taageerada ay UK iyo saaxiibbadeedu siinayaan Soomaaliya.
Arrintan ayaa muujinaysa in sii socoshada taageerada caalamiga ah ay si dhow ula xiriirto wadajirka siyaasadeed iyo qorshe cad oo Soomaaliya ay si buuxda ula wareegayso mas’uuliyadda amnigeeda.
