Hogaamiyaha dowlad goboleedka koonfur galbeed soomaaliya, Mudane Sheekh Aadan Maxamed Nuur (Madoobe), ayaa hambalyo iyo duco u diray dhammaan ardayda Soomaaliyeed, gaar ahaan ardayda Koonfur Galbeed Soomaaliya, kaddib markii maanta la shaaciyey natiijada Imtixaanka Shahaadiga ah ee Fasalka 8-aad.
Guddoomiye Aadan Madoobe ayaa si gaar ah ugu hambalyeeyey ardayda ku guuleysatay natiijooyinka wanaagsan, isagoo u rajeeyey in guushoodu ay noqoto bilowga mustaqbal waxbarasho oo ifaya.
Sidoo kale, hogaamiyaha wuxuu farriin dhiirrigelin ah u diray ardayda aan maanta helin natiijadii ay filayeen, isagoo kula dardaarmay in aysan quusan, maadaama guuldarro kasta ay noqon karto fursad cusub oo lagu sii dadaalo laguna gaaro himilooyinka mustaqbalka.
Mudane sheekh Aadan Madoobe ayaa Alle uga baryey dhammaan ardayda in uu u barakeeyo aqoontooda, u fududeeyo marxaladaha waxbarasho ee xiga, isla markaana ka dhigo jiil aqoonyahanno ah oo dalkooda iyo dadkooda anfaca.
Hambalyada hogaamiyaha DGKS ayaa ku soo beegmaysa xilli ardayda Koonfur Galbeed Soomaaliya loo soo bandhigay natiijada Imtixaanka Fasalka 8-aad, taas oo ah tallaabo muhiim ah oo ku aaddan horumarinta waxbarashada iyo kobcinta mustaqbalka jiilka Soomaaliyeed.
