Baydhabo – Koonfur Galbeed Soomaaliya: Waxaa magaalada Baydhabo ka socda Shirweynaha Horumarinta Waxbarashada Dowladda Koonfur Galbeed Soomaaliya, kaas oo diiradda lagu saarayo sidii loo xoojin lahaa nidaamka waxbarashada, kor loogu qaadi lahaa tayada xogta waxbarashada, loona hagaajin lahaa maamulka macallimiinta iyo tayada dugsiyada.
Shirweynaha waxaa ka qayb galay khubaro ka socday Wasaaradda Waxbarashada, Hiddaha iyo Tacliinta Sare ee Dowladda Federaalka Soomaaliya, kuwaas oo aqoontooda iyo khibraddooda ku biirinaya horumarinta nidaamka waxbarashada Koonfur Galbeed.
Khabiirrada waxaa ka mid ah Dr. Abdulkadir Jailani Mohamud, oo diiradda saaraya EMIS iyo maamulka xogta waxbarashada; Mr. Hassan Mohamed Moallim, oo ku takhasusay taya-dhowrka iyo isqiimeynta dugsiyada; iyo Eng. Abdulkadir Moaw, oo khibraddiisu ku saabsan tahay maamulka macallimiinta iyo nidaamka isxaadirinta.
Intii uu shirku socday, waxaa si gaar ah looga hadlay muhiimadda ay leedahay in la helo xog waxbarasho oo sax ah, dhammaystiran oo la isku halleyn karo, iyadoo la xoojinayo nidaamka EMIS iyo hababka lagu xaqiijinayo xogta laga soo ururiyo dugsiyada.
Sidoo kale, waxaa laga hadlay diiwaanka macallimiinta, habraacyada maamulka macallimiinta iyo xaqiijinta nidaamka isxaadirinta, si loo xoojiyo isla-xisaabtanka iyo hufnaanta adeegga waxbarashada.
Dhanka kale, shirku wuxuu xoogga saaray taya-dhowrka waxbarashada iyo Self-Assessment-ka dugsiyada, iyadoo la isla eegayo hababka lagu qiimeyn karo tayada dugsiyada, lagu ogaan karo meelaha u baahan horumar, lana diyaarin karo qorshayaal wax-ku-ool ah oo waxbarashada lagu horumarinayo.
Kulanka maanta ayaa sii ambaqaadaya dadaallada lagu dhisayo nidaam waxbarasho oo ku saleysan xog sax ah, maamul hufan, kormeer joogto ah iyo qorshe horumarineed oo la cabbiri karo.
Ujeeddada guud ee shirweynaha ayaa ah in la xoojiyo wada shaqeynta hay’adaha waxbarashada, la hagaajiyo nidaamyada maamulka iyo xogta, lana abuuro hannaan waxbarasho oo kordhiya tayada iyo waxtarka waxbarashada ee Dowladda Koonfur Galbeed Soomaaliya.
Shirweynahan ayaa loo arkaa tallaabo muhiim ah oo lagu dardargelinayo horumarinta waxbarashada Koonfur Galbeed, iyadoo muhiimadda la siinayo in qodobada iyo talooyinka ka soo baxa kulamada loo beddelo qorsheyaal iyo tallaabooyin wax-ku-ool ah oo si joogto ah loo daba-galo.
