Guddoomiyaha Hay’adda Maareynta Musiibooyinka Qaranka (SoDMA), Mudane Maxamuud Macallin Cabdulle, ayaa Xarunta Dhexe ee Hay’adda ku qaabilay Xoghayaha Guud ee Golaha Qaxootiga Norway (NRC), Mudane Jan Egeland.
Kulanka ayaa diiradda lagu saaray xaaladda bani’aadantinimo ee Soomaaliya iyo caqabadaha ka dhashay abaaraha, fatahaadaha, colaadaha, barakaca iyo cunto-yarida, iyadoo sidoo kale laga hadlay khatarta la xiriirta Super El Niño iyo saameynta ay ku yeelan karto bulshada Soomaaliyeed.
Mas’uuliyiintu waxay isla soo qaadeen sidii loo xoojin lahaa iskaashiga dhinacyada u-diyaargarowga iyo ka jawaabista musiibooyinka, gaar ahaan xoojinta nidaamyada digniinta hore, gurmadka deg-degga ah iyo adkeysiga bulshada.
Intii uu booqashada ku guda jiray, Jan Egeland ayaa kormeeray xafiisyada iyo howlaha kala duwan ee SoDMA, isagoo si gaar ah u eegay shaqada Hay’adda ee la xiriirta saadaasha iyo digniinta hore, isku-dubaridka gurmadka iyo dadaallada lagu xoojinayo awoodda bulshada ay ugu diyaargarowdo musiibooyinka
.Kulankan ayaa muujinaya muhiimadda ay leedahay iskaashi xooggan oo dhex mara hay’adaha dowladda Soomaaliya iyo bah-wadaagta bani’aadantinimo, si loo yareeyo saameynta musiibooyinka loona gaarsiiyo bulshada nugul gargaar ku habboon oo waqtigiisa ku yimaada.
