Soomaaliya iyo dalalka gobolka ayaa Nairobi ku yeeshay kulan looga hadlay xoojinta iskaashiga amniga badda, xilli burcad-badeednimada iyo dambiyada kale ee ka dhaca Gacanka Cadmeed ay mar kale walaac ka abuureen gobolka.
Saraakiil ka kala socotay Soomaaliya, Itoobiya, Jabuuti iyo Yemen ayaa ka qayb galay kulan laba maalmood socday oo looga hadlayay sidii loo xoojin lahaa wadaagga xogaha iyo iskaashiga hay’adaha ammaanka badda, iyadoo diiradda la saaray ilaalinta Badda Cas iyo Gacanka Cadmeed.
Kulanka oo ay fududeysay Xafiiska Qaramada Midoobay ee Daroogada iyo Dambiyada (UNODC), ayaa sidoo kale looga hadlay burcad-badeednimada, kalluumeysiga sharci-darrada ah, tahriibinta dadka, tahriibinta muhaajiriinta iyo ganacsiga daroogada.
Qaramada Midoobay ayaa sheegtay in khataraha badda aysan ku koobnayn hal dal, isla markaana dhacdooyinka ka dhaca qayb ka mid ah gobolka ay saameyn ku yeelan karaan dalalka kale, taasoo ka dhigaysa wadaagga xogaha iyo iskaashiga hawlgallada mid muhiim ah.
Kulanka ayaa ku soo beegmaya xilli Soomaaliya iyo xeebaha ku dhow Gacanka Cadmeed ay wajahaan dib-u-soo-kabasho burcad-badeednimo. Weerarro iyo afduubyo dhowr ah ayaa sanadkan laga soo sheegay biyaha gobolka, iyadoo qaar ka mid ah maraakiibta la afduubtay lagu haysto xeebaha Soomaaliya.
Mas’uuliyiinta kulanka ka qayb galay ayaa sidoo kale carrabka ku adkeeyay muhiimadda ay leedahay in Soomaaliya, Yemen, Jabuuti iyo Itoobiya ay si dhow isaga kaashadaan xogta ku saabsan dhaqdhaqaaqyada looga shakiyo badda iyo jawaabaha degdegga ah ee khataraha.
Kulanka Nairobi ayaa ku soo aadaya xilli dalalka gobolka ay raadinayaan hab iskaashi oo lagu wajahayo khataraha ka jira mid ka mid ah marinnada badda ee ugu muhiimsan dunida, kaas oo isku xira Badweynta Hindiya, Gacanka Cadmeed iyo Badda Cas.
