Saraakiisha Qaybta 60aad ee Ciidanka Xoogga Dalka Soomaaliyeed, oo hay’adaha amniga kala shaqeynaya dadaallada lagu adkeynayo amniga magaalada Baydhabo, ayaa ciidamo hor leh gaynaya duleedka magaalada.
Baydhabo ayaa ah xarunta Taliska Qaybta 60aad ee Ciidanka Xoogga Dalka, halkaas oo Taliyaha Qaybta 60aad, Gaashaanle Dhexe Isaaq Aadan Berdaale, uu ku abaabulayo ciidamo cusub oo lagu xoojinayo kuwa horay ugu sugnaa duleedka magaalada.
Cutubyo ka tirsan Guutada 8aad ee Qaybta 60aad, Booliska Milateriga, Kumaandooska Gorgor iyo Daraawiishta Koonfur Galbeed ayaa ku sugan baraha kontoroollada laga soo galo magaalada, iyadoo ciidamada qaarkood ay sidoo kale fariisimo ku leeyihiin hareeraha Baydhabo.
Xoogag ka tirsan Kumaandooska Danab oo Axaddii la geeyay Baydhabo ayaa la filayaa inay ku biiraan ciidamada ku sugan duleedka magaalada.
Saraakiisha Ciidamada Dowladda Federaalka ee ku sugan Baydhabo ayaa Jimcihii kormeer dhiirrigelin ah ugu tegay ciidamada qalabka sida ee loo xil saaray sugidda amniga magaalada iyo nawaaxigeeda.
Dhaqdhaqaaqyada cusub ee ciidamada ayaa kusoo beegmaya xilli ay magaalada ka taagan tahay xiisad siyaasadeed iyo mid amni, iyadoo sidoo kale ay jireen hadallo siyaasadeed oo ku saabsanaa xaaladda Baydhabo iyo awoodda Dowladda Federaalka.
Madaxweynihii hore ee Koonfur Galbeed, Cabdicasiis Xasan Maxamed (Laftagareen), ayaa Khamiistii sheegay in Dowladda Federaalka ay xoog kula wareegtay magaalada Baydhabo, taas oo sii kordhisay walaaca laga qabo in xiisadda siyaasadeed ay isu beddesho mid amni.
Xiisadaha siyaasadeed iyo amni ee ka taagan Koonfur Galbeed ayaa saameyn ku yeelanaya shacabka ku nool Baydhabo, oo ah xarunta maamulka Koonfur Galbeed.
Xaaladda magaalada Baydhabo ayaa weli ah mid kacsan, iyadoo laga dareemayo cabsi iyo dhaqdhaqaaqyo ciidan. Xiisaddan ayaa daba socota dagaalkii khasaaraha badan dhaliyay ee 17-kii bishan ka dhacay magaalada.
Loollanka siyaasadeed iyo dhaqdhaqaaqyada militari ee ka jira Baydhabo ayaa sidoo kale saameyn ku yeeshay nolol maalmeedka shacabka, iyadoo dadka qaarkood ay muujinayaan cabsi, halka dhaqdhaqaaqa ganacsigana uu gaabis ku yimid.
Inkasta oo ciidamada dowladda iyo kuwa maamulka Koonfur Galbeed ay sii xoojinayaan goobaha muhiimka ah ee magaalada, haddana shacabka ayaa weli walaac ka qaba jihada ay xaaladdu u socoto iyo saameynta ay xiisadda siyaasadeed ku yeelan karto amniga iyo nolosha dadka.
Dhanka kalemagaalooyinka Afgooye iyo Xudur oo lagu wado in laga qoro dhallinyaro cusub
Saraakiil ka kala tirsan Taliska Qaybta 60aad ee Ciidanka Xoogga Dalka iyo Daraawiishta Koonfur Galbeed ayaa lagu wadaa in ay qorista dhallinyarada loo qaadanayo shaqada ciidamada ka bilaabaan Magaalooyinka Afgooye iyo Xudur ee Gobolada Shabellaha Hoose iyo Bakool.
Wararka ayaa sheegaya in Saraakiisha Ciidamada ay dhallinyarada ku xulanayaan caafimaadka jirka, maskaxda iyo dal jaceylka.
Saraakiishan ayaa waxay wararku sheegayaan in ay ka jawaabayaan Hoggaamiyaha Dowlad Goboleedka Koonfur Galbeed, Aadan Maxamed Nuur (Aadan Madoobe) oo faray in qorista iyo soo xulista dhallinyarada ee laga bilaabay Gobolka Baay, gaar ahaan Magaalada Baydhabo lagu ballaariyo labada gobol ee kale ee Koonfur Galbeed.
Aadan Madoobe oo taageero toos ah ka haysta Dowladda Federaalka ayaa diiradda saaraya, sidii uu maamulku ku yeelan lahaa cudud ciidan oo diyaar ah.
Maamulka Aadan Madoobe ayaa hadda si weyn ugu tiirsan taageerada Ciidamada Dowladda Federaalka ee maamulkiisa ku ilaaliya Magaalada Baydhabo.
Aadan Madoobe ayaa doonaya in la helo ciidamo dadka deegaanka ah oo ka qayb qaata sugidda amniga guud ee deegaanada Koonfur Galbeed, la dagaalanka argagixisada iyo cid kasta oo khatar ku ah in uu maamulku si buuxda u shaqeeyo.
Aadan Madoobe ayaa mucaaradad kala kulmaya Madaxweynihii hore ee Koonfur Galbeed, Cabdicasiis Xasan Maxamed (Laftagareen) oo ku hanjabay inay ka qabsan doonaan Baydhabo oo saldhig u ah maamulkiisa, isla-markaana ay ku yaallaan Xarumaha Madaxtooyada iyo Baarlamaanka.
